Shillong, Risaw 04
Ka jingpynbiang ïa ki kot ki sla jaka ba katkum ka aiñ bad ka jingithuh ïa ki nongshong shnong ha khappud ka dei ka lad ban ïada pyrshah ïa ka jingwan buhai shnong da ki nong Assam, ong u MDC ka Jaiñtia Hills Autonomous District Council (JHADC) u Bah Moonlight Pariat.
Haba pynpaw ïa ki sienjam jong ka Council ban ïada ïa ki jaidbynriew ha ki thaiñ khappud, u Bah Pariat u la pynpaw ba ka JHADC ka la ithuh bad pynthikna ïa ka Elaka Labang Nongphyllut kaba kynthup ïa ki shnong kiba don ha ka thaiñ Block-I ka West Jaiñtia Hills, Meghalaya bad Karbi Anglong, Assam.
U la ban jur ïa ka jingdonkam ban don ki kot jaka khyndew jong ki nongshong shnong jong ka thaiñ na ka bynta ban pynkhlaiñ ïa ka jinglong trai ïa ki jaka ba katkum ka aiñ, wat haba ladep ka jingpynbeit ïa u pud u sam ba pura bad kane kan ïada ïa ka jingshah shim ïa ki jaka.
Haba pynpaw ïa ki jingsngewkhia ha ba ïadei ka jingwan rung ki Pulit Assam dang shen hapoh ka shnong Mukroh, u Bah Pariat u la kdew ba kane ka jingjia ka la wanrah ïa ka jingsngewsyier hapdeng ki nongshong shnong, hynrei ka la mih na ka jingbym ïasngewthuh jingmut, naduh kata ka por lyngba ka jingïakren hapdeng baroh ar tylli ki Jylla la lah ban pynbeit ïa kane.
Haba ïadei ki jingeh kiba ka District Council ka ïa kynduh, u la batai ba ki jingïa kajia khappud hapdeng ki Jylla ki hap hapoh ka jingpeit jingkhmieh jong ka Sorkar Pdeng bad ka Sorkar Jylla.
U Bah Pariat u la kren ruh halor ka jingkynthoh ki paidbah ha kaba ïadei ka jingdon jong ka Council ha ka por ba don ka jingïakynad khappud, ha kaba u la batai ba ki nongshong shnong bunsien kim ju phah jingtip sha ka JHADC haba mih ki jingïakynad, kaba pynlong ïa ki bor pynïaid ban ïoh jingtip ïa ki jingjia tang lyngba ki kot khubor lane ki jingtip ba na ki lad pathai khubor.
U la ai jingkular ba ka District Council ka long kaba la khreh pura ban don bynta bad ban kyrshan ïa ki nongshong shnong ha ki thaiñ khappud ha kano-kano ka por ba ki donkam, katba ka dang ïai bteng ban pynleit jingmut ha ka ban pynskhem ïa ki jingthoh kot jaka ha ka thaiñ.
