Tura, Risaw 04
Ka metïap jong u nongñiah kali na ka sor Tura, uba la jah naduh ka 28 tarik Nailur, 2026, la lap noh na ka shnong Joshipara kaba hap hapoh ka thanad Dalu ha West Garo Hills district.
Kane ka metïap ka dei jong u Samuel R Marak, ïa uba la ïohi khatduh hajan jong ka Akonggre PIK-Up stand ha ka por kumba 1 baje mynsngi, bad hadien kata u la jah rngai ryngkat bad ka kali kaba u ñiah. Ïa ka jingujor jong ka jingjah rngai, la ujor da ka kurim ka jong u, ka Posna D Shira ha thanad Tura bad la pynbud da ka jingtohkit halor kane. Ïa ka jingujor la ai ha ka 30 tarik u bnai ba la lah.
Na ka jinglong jingman jong ka met jong utei u briew kaba la lap, ki pulit ka district ki la suba jur ba ka lah ban dei ka kam shah pynïap. Katba ïa ka kali kaba la ñiah da u Samuel R Marak (ML08-H-2862) haduh mynta ym pat lap ryngkat bad ki ar tylli ki mobile phone kiba u la rah.
Katkum ka tyllong khubor, la ong ba u Samuel u la shah pynïap dusmon hashwa ban bret pat ïa ka met jong u. La ong ba ka jinglap ïa ka met jong u, ka la long hadien ba ka la don ka jingsma kaba la mih na ka met kaba la sdang ban kem pyut, ha kaba ki nongshong shnong ki la pyntip mar mar sha ki pulit, kiba la leit mar mar ha ka step jong ka 4 tarik bad shimti noh ïa ka met.
La suba ba ka jingshah pynïap ka la jia ha ka sngi kaba u la jah rngai, watla haduh mynta ym pat ïoh ïa ka khubor kaba thikna halor kane ban pynshisha ïa ka sngi shah pynïap.
Na ka liang jong ki pulit ki la dep ban register ïa ka case pynïap briew bad ka jingtohkit ka la ïaid shakhmat ban thwet bad kem ïa ki briew kiba donkti halor kane ka kam.
