Shillong, Risaw 05
U Myntri ka tnad ka koit ka khiah, u Bah Wailadmiki Shylla ha ka Lah Sngi U Blei u la ong ba ka jingwad jingtip kaba bniah ka dang ïaid shakhmat hadien ba ka ‘High Court’ ka la kdew ïa ka jingnang kiew ha ka jingdon jong kiba ïoh ïa ka jingpang ring bad pynhiar mynsiem ne ‘respiratory infection’ ha ka thaiñ Byrnihat.
“Ngim pat ïoh ïa ka kaiphod kaba khatduh, ngi la bthah ïa ki bor ba dei peit. Wat hashuwa kata ruh, ngi la pyrshang ban pynlong (ïa ka jingwad bniah),” la ong u Bah Wailad ha ki nongthoh khubor.
Da kaba pynpaw ba kum kane ka jinglong ym shym la ïohi mynshuwa, u la ong, “Ngim shym la ïohi ïa kane, hynrei dang shen ha ryngkat kata ka kaiphod, ngi dang khmih bniah. Ngi dang phah ïa ka kynhun jong ngi ban leh ïa ka jingwad bniah. Haduh mynta, ngam pat ïoh ïa ka kaiphod.”
“Ngan sa lah ban ong eiei hadien ba nga la ïoh ïa ka kaiphod kaba khatduh,” u la bynrap.
U Myntri u la pyntip shuh-shuh ba ka jingtrei ka dang ïaid shakhmat ban pynbha ïa ki jingtei ba ïadei bad ka koit ka khiah ha katei ka thaiñ.
“Haba ïadei bad ki jingtei, ngi la dep rai ban kyntiew kyrdan ïa ka PHC kaba mynta sha ka CHC. Ngi la don ha ka lynti ban kyntiew kyrdan ïa kane ka jingtei. Lada phi leit mynta, ka jingpyntrei ka dang ïaid shakhmat,” la ong u Bah Wailad.
