Shillong, Risaw 05
Ka Sorkar Jylla ha ka Lah Sngi U Blei ka la ong ba kam donkam ïa ka jingtohkit CBI halor ka jingkhynra ha Jaïaw kaba la jia ha ka 19 tarik u Nailar, da kaba kyntait ïa ka jingdawa jong u MLA ka North-Shillong, u Bah Adelbert Nongrum.
U Symbud Myntri Rangbah ka Jylla ka tnad kam pohïing, u Bah Prestone Tynsong u la ong ha ki nongthoh khubor ba lada ki don ki jingbakla ha ka rukom treikam, lah ban pynbeit hi da ki pulit ka Jylla.
“Kumba long mynta, ngim donkam ban leit sha ka CBI. Hooid, ka jingduna ne jingbakla ka lah ban jia teng khat, hynrei ïa kane lah ban pynbeit,” la ong u Bah Prestone.
U la ong ba u la bthah ïa ki heh pulit ban pynbha ïa ka jingïatreilang bad ki bor synshar shnong hashuwa ban pynlong ïa kum kitei ki jait kam.
“Nga la bthah ïa ka DGP bad ka tnad kam pohïing ban pynbha shuh-shuh ha ka ban kynjoh sha baroh ki bor ba dei khmih ha kano-kano ka por ba thmu ban leh eiei,” u la ong.
“Ki bor synshar shnong ki dei ki paralok, ki dei shi bynta ban pynneh-pynsah ïa ka suk ka saiñ na ka por sha ka por,” la bynrap biang u Bah Prestone.
