Shillong, Risaw 05
U Symbud Myntri Rangbah ba khmih ïa ka tnad PWD (Roads) Bah Prestone Tynsong ha ka sngi Nyngkong u la ther kylla ïa u President ka VPP Bah Ardent Miller Basaiawmoit na ka bynta ka jingpynkylla kam politik ïa ka jingïap i khyllung ha Rambrai, bad ong ba kane ka shnong kam pat ïoh surok naduh ba ka Meghalaya ka la ïoh ïa ka Jylla kaba pura.
Ka shnong Domkyn-roh kaba hap ha Rambrai, ka dei ka shnong kaba ym pat ïoh surok naduh ba ka Meghalaya ka ïoh ïa la ka jong ka Jylla.
“Ban ïathuh shai ha u Bah Ardent lane ïa kito kiba kren pyrshah ïa kane ka jingjia, ba kane ka shnong ka dei kawei na ki shnong ka bym pat ju ïoh surok. Kam dei satia ba ka jinglong jingman jong ka surok ka long kaba sniew, ka dei ba kam don surok satia ha kane ka shnong,” ong u Bah Prestone haba pynshai ïa ka jingjia ha Rambrai.
U Bah Prestone u la pyntip ba ka Sorkar kala dep ban leh eiei halor ka jingdawa kaba la slem bha jong ka thaiñ.
“Ha ki khyndiat bnai bala lah, nga la buh ïa u mawnongrim ban sdang shna ïa ka surok napdeng jong ka Rambrai kum shibynta jong ka plan ban pynïasoh shaduh sha Nongnah. Ngi la mang T.25 klur bad la dep ai ruh ïa ka preliminary work order,” u la ong.
U Bah Prestone u la bynrap ba ka jingtrei kan sa sdang shisien ba la dep pynkhreh ïa ki kam da u kontraktor bad pynpaw ïa ka jingkyrmen ba ka projek kan wanrah ïa ka jingmyntoi ïa bun ki shnong.
“Nga kyrmen skhem ba kane ka surok kan pynmyntoi ïa ki 8 ne 9 tylli ki shnong ki bym pat ju ïoh surok naduh ba ngi ïoh ïa la ka jong ka Jylla,” u la ong.
Haba pynpaw ba ki jingpynïasoh surok ki dei ki kam ba hakhmat eh ka Sorkar naduh u snem 2013, u Bah Prestone u la ong ba bun ki shnong ki bym pat ïoh surok kila ïoh surok mynta bad ki surok khlaw ruh kiba bun la dep ban shna bha.
Haba kubur ba ki jingduna ki dang don, u Bah Prestone u la ong, “Ngam ong ba 100 per cent la dep ban leh, ki dang don shibun kiba hap ban leh. Phim lah ban ong ba haba ym don surok, phi hap ban ai surok sha ki 101 per cent ki shnong. Ngi la pyrshang ban pynpoi surok sha kito ki shnong ki bym pat don surok bad ngi la kut jingmut ba man ki shnong ki dei ban pynïasoh surok”.
