Shillong, Risaw 05
U Bah Wailadmiki Shylla ha ka sngi Nyngkong u la ong ba ka jingkhmih bniah ka dangïaid shakhmat ban pynbeit ryntih ïa ki jaka sumar, khnang ba ki shnong ba jngai na ki surok kin ym donkam ban leit sha ki jaka ba jngai na ka bynta ban ïoh jingsumar.
Ïa kane u Myntri u la pynpaw hadien ka jingkhlad noh jong i khyllung ha Domkyrkoh, West Khasi Hills, namar ka jingbym biang ka jingpynïasoh surok.
U Bah Wailadmiki Shylla u la ong ba ka Sorkar ka dang bishar bniah ïa ki jingduna bad ki lad ban ïoh ïa ki jaka sumar ba biang.
“Mynta ngi dang wanrah ïa ka jingpeitbniah ha kaba ïadei bad ka jingdon jong ki jaka sumar, ban pynthikna ba kawei ka shnong kam dei ban ïaid jngai than ban poi sha ki jaka sumar,” u la ong bad bynrap ba ka jingthmu kan shim por katto-katne.
Haba kynthoh halor ka jingkhlad i khyllung, u Myntri u la ong ba ine i khynnah i la khlad noh shuwa ban poi ha hospital bad ka jingeh kadei ka jingbym don surok.
“Ka long kaba sngewsih ba ine i khyllung ila duh noh ïa ka jingim kaba kordor,” u la ong.
U la ong ba ki don ki jaka ha ka Jylla, kiba dang sahkut ban poi surok.
“Ym tang ha kata ka jaka, ki don katto-katne ki jaka ba ka jingpynïasoh surok ka dangdon ha ka jingeh. Ïa ine i khyllung la wanrah ïap shuwa ba in poi ha jaka sumar,” la ong u Bah Wailadmiki.
U la ong ba ka tnad ka koit ka khiah kam don jingtip lypa halor ka jingshitom ine i khyllung.
“Nga la kylli hato ki la pyntip shano-shano na ka tnad ka koit ka khiah. Kim shym la pyntip wat sha ka ASHA. Kumta ka tnad ka koit ka khiah kam tip satia,” u la ong.
U la ong ruh ba ïa ka jingïap dei ban peit kum ka jingbym lah ban pynïasoh surok, ym kum ka jingbym lah ban ai jingshakri.
“Ka long kaba sngewsih shibun hynrei ka jingeh hangne kadei bad ka jingpynïasoh surok, ym ki jingshakri namar ba ine khyllung im pat poi ha ka jaka sumar,” u la bynrap.
“Ka Sorkar ka trei shitom ha kaba ïadei bad ka jingpynïasoh surok. Kham bun ki jaka ngi la leh, hynrei ngim lah ban leh lut ha ka shisien leh. Ngi dang pynthikna ruh ba ki kali kiba biang kin don bad ha ka jingtyrwa, ngi la buh ba donkam ïa ka kali kit nongpang 4×4,” u la ong.
Da kaba pynksan ba ka roi ka par ka hap ban ïaid ha ki bun ki bynta, u la ong, “Kadei ka jingpyrshang jong ka Sorkar ban ai ïa ka jingpynïasoh ha man la ki shnong. Ngim lah ban buh hakhmat eh tang ïa ka jingpynïasoh surok, namar baroh ki hap ban leh ha kajuh ka por.”
“Kiba bun ki jaka kiba ngi la lah ban pynïasoh, ki projek kiba bun ki dangwan bad ngi pyrshang na ka bynta kaba bha tam, ba ka jingpynïasoh surok kadei ban poi sha ki jaka kiba dang jynjar,” la bynrap u Bah Wailadmiki.
