Shillong, Risaw 05
Halor ka jingkhlad i khyllung iba dang lai snem ka rta na ka shnong Domkyrkoh ha ka por ba dangrah ïa i ban shah sumar, ki bor pynïaid District, West Khasi Hills, ki la pan ïa ki kaiphod ba bniah na ki bor jong ka tnad ka koit ka khiah, ki Block bad ki bor jong ka tnad PWD.
Ki bor District ki la ong, ba la pan kaiphod na u Block Development Officer, Rambrai, District Medical and Health Officer, West Khasi Hills, bad na u Executive Engineer, PWD (Roads), ban pynbeit ïa ka jingbud ryntih jong ki jingjia.
Katkum ka jingtip ba nyngkong, ine i khyllung ila kham pang jur bha ha Domkyrkoh, kaba hap hapoh ka Mawkhiat Sub-Centre, PM-ABHIM, kaba la treikam naduh u snem ba la dep bad kaba don kumba shi kynta shiteng ban ïaid kjat na katei ka shnong kaba hap hapoh ka Rambrai PHC.
Ki bor District ki la ong ba ka jingkit jingbah kyrkieh hapoh ka Chief Minister’s Safe Motherhood Scheme (CMSMS), ka don ha kane ka thaiñ hynrei ym shym la lah ban pyntreikam ïa ka.
“Ki jingtip ba nyngkong ki pyni ba ki nongtrei ka koit ka khiah ha ka thaiñ kim shym la pyntip shaphang ka jingpang jong i khynnah shwa ne ha ka por ba sdang ki dak jingpang, bad kumta ïa ka lad ban kit kyrkieh ha jaka sumar, ym shym la lah ban leh ha kata ka por,” ki la ong.
Ki bor District ki la kam ruh ïa ka jinglong kyrpang ka shnong Domkyrkoh, bad ha kaba ki kali ki hap ban ïaid lyngba ka shnong Maihop bad ka surok ha katei ka shnong ruh ka jynjar bha ïa ki kali ban ïaid khamtam ha ka por ba jur u slap, bad ki kali ruh ki duna bha.
Ban weng ïa ki jingeh, ki bor pynïaid ki la ong ruh ba ïa ka projek surok kaba 10 kilomiter, “Ka surok 4 kilomiter jong ka Rambrai- Mawrok PMGSY Road sha Nonglang lyngba ka Domkyrkoh, Phase-I, la mang hapoh ka Central Road and Infrastructure Fund (CRIF).
“Ka surok ba la mang kan ai jingpynïasoh beit sha shnong Domkyrkoh bad kan pynbha ban leit shaduh sha shnong Mawdet bad ki jaka sah ba marjan. Kan pynbha shibun ïa ka leit ka wan ki paidbah bad ban ïoh ïa ka jingsumar ha ka pang ka shitom, ki jingshakri ba kham kyrkieh,” la kdew ki bor pynïaid.
Kum ka sienjam kaba kyrkieh, ka kynhun ka koit ka khiah, kan pynlong ïa ka jingpeit bniah ha ki jaka ha shnong Domkyrkoh ha ka 06 tarik u Risaw 2026, bud sa ka jingleit jngoh shuh-shuh ban bishar bniah ïa ki jingdonkam ha ka koit ka khiah bad ki jingeh haba donkam kyrkieh.
“Ki jinglap bad ïohi, kin dangpynkloi ïa ki bor synshar District ban shim ki lad ki lynti kiba biang mardor ban pynkhlaiñ ïa ka jingïoh jingsumar ki nongshong shnong bad ha ki por ba kyrkieh,” ki la ong, da kaba bynrap ba yn kyrpad ïa ka tnad PWD Road ban pynsted ïa ka jingpyntrei ïa ka surok CRIF.
“Ki bor District ki pynpaw ïa ka jingsngewkhia kaba khraw halor ka jingduh noh kaba sngewsih ïa ine i khyllung bad ka pynpaw biang ïa ka jingkular jong ka ban buddien bha ïa ka jinglong jingman,” la bynrap shuh shuh ka kyrwoh.
