Shillong, Risaw 06
Hadien katto-katne taïew na ka jingjia shah pajut soh-shkor kawei ka longkmie ha Red Cross, Laban ha kaba u nonglute u dei uba kyrni dih drok, ha ka miet 05 tarik u Risaw, 2026, la paw sa kawei ka kam lute da kaba pyrshang pynïap briew da uwei u briew uba kyrni drok ha Nongmensong.
Katkum ki khubor ba la ïoh lum la ong, ba ha ka por 9 duna eiei, kawei ka khynnah samla kynthei katba ka dang mih na ka jaka trei jong ka, kata na ka mall die jaiñ kaba la tip kum ka Trends ha ka dong Umkdait jong katei ka shnong, kane ka samla ka la ïeng ha lad surok kaba kiew na khap katei ka dukan die jaiñ sha dong Lumshyiap bad kynsan ha katei ka por, la wan u tei uba kyrni drok uba dei u bar jylla bad knieh ïa ka mobile phone jong ka.
Ha ka jingïakhun, kaba la poi kham haneng jong katei ka lad surok, u tei uba kyrni drok u la dung ïa ka na ryndang da ka khanshi.
U ne uba kyrni dih drok u la pyrshang ban phet na katei ka jaka, hynrei la ïoh bat da ki katto-katne ngut kiba don ha katei ka jaka kiba la tan ïa u sha surokbah.
Kham hadien kane ka samla ryngkat ka snam kaba tuid na ryndang ka la rung biang shakhmat dukan haduh ban da wan kiba ïarap pynkit ïa ka sha NEIGRIHMS da ki ar ngut ki shipara kynthei.
Shuh-shuh ha katei ka por la wan poi sa ki bor pynïaid ka dong Umkdait bad Village Defence Party (VDP) Nongmensong bad ïa utei uba kyrni drok la aiti sha ki pulit kiba la rah shuwa ïa u ban phah check-up.
Haba buddien ïa ka jingjia ha ka step 06 tarik u Risaw, 2026, u Bah T.Thabah, President VDP Nongmensong u la ong ba katei ka samla kadei kaba sah wai ha Umkdait.
U la ong ba ha ka jingwad bniah ha ka miet ba la dep la ong ba ka don ka kynhun kaba don lai bad saw ngut kiba kyrni drok, hynrei ym pat lah ban pynshai bha.
Kumba long kane ka samla ka dang shah sumar ha NEIGRIHMS bad katkum ka durkhih ba la ïoh ringdur ïa u tei uba kyrni drok la don kiba ithuh ïa u kum u Gunni.
