Shillong, Risaw 06
Haba kyntait ïa ki khubor hamsaïa ba ka BJP ka pyrshang ban khwai ïa ki MLA ka NPP, u State-President ka BJP, u Rikman G. Momin ha ka Sngi Ba-ar u la ong ba kane ka jingkylli kam mih satia – ban leit kynjoh ktien sha la ki jong ki paralok.
“Balei ngin leit kynjoh ktien ha kaba nyngkong? Ka NPP ka dei ka paralok jong ngi bad ngi shah kynthup lang ha kane ka Sorkar MDA. Balei ngin leh kumta? Kine baroh ki dei ki hamsaïa ki bym don jingmut kiba la pynsaphriang”, la ong u Momin.
Haba kylli la hato ka BJP ka la dawa ne em ban pynkha shuki Myntri shuh hadien ka jingkiew ha ka jingbun paid sha ka 10 ngut hapoh Ïingdorbar, u la ong, “Ngim shym la dawa eiei.”
Hynrei u la ong ba ki jingkhang jong ka seng ki plie ïa kino-kino kiba kwah ban pynïasoh.
“Kito kiba kwah ban pynïasoh sha ka BJP bad kiba kwah ban trei na ka bynta ki paidbah ka Meghalaya, ngi pdiang sngewbha ïa kino-kino kiba wan pynïasoh,” u la ong. Ka NPP ka dei ka paralok, balei ngin leit kynjoh ktien ïa ka: BJP
La hato ka seng ka la kynjoh ne em sha ki MLA ka TMC, u Momin u la ong, “Uno-uno u lah ban pynïasoh sha ka seng. Ngam shym la pynïadei kyrpang ïalade bad ka NPP ne mano-mano ruh. Mano-mano ruh ki lah ban pynïasoh sha ka seng.”
Haba kynthoh ïa ki jingkynnoh ba ki MLA ka NPP ki la ïoh ïa ka jingkhot ban rung sha ka BJP, u la ong, “Wan ïalam ïa uta u MLA ka NPP sha nga khnang ba u lah ban pyni ïano-ïano na ka BJP kiba la ïakynduh ïa u.”
Haba kylli la hato ka seng jong u ka ïoh pdiang ne em ïa ki ‘feeler’ na ki, u Momin u la ong, “Em, ngam ïoh ïa kita ki ‘feeler’ ïa mynta.”
