Shillong, Risaw 06
U Myntri Rangbah ka Jylla Conrad K Sangma ha ka sngi Ba-ar u la kyntait ïa ki khubor hamsaia ba ka NPP kan weng noh ïa ka BJP na ka kynhun MDA bad ruh ba ka BJP ka pyrshang ban pyntroin ïa ka NPP ban thaw la ka jong ka Sorkar.
U Conrad u la pynshai ruh ba kam shym la don satia ka jingïakren ban ai shuki Myntri ïa ki MLA kiba dang shu pynïasoh sha ka BJP.
Haba shim ba ka jingmih ki khubor hamsaia ha kine ki sngi ki dei ki bym shisha, u Conrad u la ong, ka NPP watla ka don haduh 33 ngut ki MLA, kam shym la weng ïa la ki jong ki paralok ha ka jingbujli Myntri ba khatduh jong ka.
“Ka NPP kala ïoh ïa ka jingbun paid marwei da 33 ngut ki MLA bad lada ka kwah kan jin da weng lut ïa baroh ki paralok ha ka jingbujli shuki Myntri ba khatduh. Hynrei kum ka kynhun synrop bad wat kum ka seng saiñpyrthei ngi la kren shai halor ki nongrim ba ngi la tei ïa kane ka kynhun synrop bad kawei na kine ki nongrim ka long ban pynthikna ba ngin ïatreilang,” u la ong.
Shuh shuh u Myntri Rangbah u la ong, “U nombor u lah ban kylla hangne hangtai. Ka jingïadon bynta ha ka kynhun Myntri ka lah ban kiew bad hiar hynrei ka mynsiem jong ka jingïatreilang bad ym ban ieh noh shadien ïa la ki paralok tang namar ba ngi la biang ka nombor, kane kam dei ka lynti ba ngi ïapynbeit ha ka saiñpyrthei.”
Haba pynpaw ba ki paralok kila aiti lut ïalade sha ka MDA, u Conrad u la ong, “Nga la ju kren sha ki nongïalam jong ki seng saiñpyrthei jong baroh ki paralok ba ïatreilang bad baroh kila mynjur bad aiti lut ïalade sha ka kynhun synrop. Hynrei hooid, kila pynpaw ïa ki jingeh ha ki kam pohïing haba phai sha ki seng ki jong ki kaba lam sha ka jingkhih jong ki katto katne ki MLA na kawei ka paralok ba ïatreilang sha kawei pat”.
Haba kylli halor ka jingbujli Myntri bad la ka Sorkar ka thmu ban ai shuki Myntri ïa ki MLA ba leit ïasoh BJP dang shen, u Conrad u la ong, “Kam shym la don ka jingïakren halor kane ka bynta bad kam don ruh kano kano ka jingthmu ban pynrung Myntri ïa kino kino na kine ki 8 ngut ki MLA kiba leit ïasoh dang shen sha ka BJP”.
“Kam shym la don kano kano ka jingïakren bad ka jingpynrung Myntri. Kam shym la don kata ka jingïakren naduh kaba sdang ruh bad kam don jingïakren ruh hapdeng bad wat hadien ba ki la pynïasoh bad haduh mynta,” u la ong.
U la pynpaw ruh ba ka jingleit ïasoh ki 8 ngut ki MLA ka UDP sha ka BJP kam shym la pyni ïa kano kano ka dak jingeh ha ka saiñpyrthei khleh khaw lang.
“Lada kine ki MLA ki kynthih sha kano kano ka seng saiñpyrthei kaba don shabar ka kynhun synrop bad ïasoh sha ka Liang Pyrshah, hooid ki lah ban mutdur ba ka don kano kano ka jingbym shaniah lane kano kano ka jingeh ha ka kynhun synrop hynrei ka jingkynthih ka jia na kawei ka paralok sha kawei pat. Kumta, ka jingkylli ba ym don shuh ka jingshaniah kam mih satia,” u la ong haba kyntait ban kynthoh ïa ki kam pohïing jong kiwei pat ki seng saiñpyrthei.
