Shillong, Risaw 06
Ki la don haduh khyndai ngut kiba la pan tiket na ka BJP ban ïakhun ïa ka ilekshon MP Lok Sabha shiteng samoi na Shil-long Parliamentary Con-stituency ka la ai mynsiem ïa ki hadien ba phra ngut ki MLA ka UDP ki la rung sha ka BJP.
Napdeng ki khyndai ngut kiba la pan, lai ngut kiba la tip kyrteng ki long ki nongkitkam kiba hakhmat ka BJP kata u Bah Ernes Mawrie uba dei u President barim ka BJP Meghalaya State Unit, Bah Wankitbok Pohshna uba dei u General secretary ba mynta, ka Kong Arena Hynniewta kaba dei ka President BJP Megha-laya Mahila State Unit.
Katkum ki khubor kiba la ïoh lum kine ki nongkitkam ki la dep phah ïa ka jingtyrwa ban ïakhun ïa ka ilekshon MP ha kine ki bnai ba la dep bad mynta ïa ki kyrteng jong ki nalor kiwei pat la dep phah sha ka BJP ha Delhi.
Ka BJP kan sa pynbna ïa u ne ka kyrtong ban ïakhun ïa ka ilekshon MP Lok Sabha ha Shillong tad ynda ka Election Commission jong ka ri India ka la pynbna ïa ka tarik thep vote.
Ki lai ngut ki nongkitkam kiba la pan tiket ki la sngew ïoh mynsiem hadien ba ki phra ngut ki MLA ka UDP ki la rung sha kane ka seng namar ha ka por ba ki pan tiket ki MLA ka BJP ki don tang ar ngut kata u Bah Sanbor Shullai na South Shillong constituency bad Bah AL Hek na Pynthorumkhrah hynrei mynta ka jingdon ki MLA jong ka BJP ha Shillong parliamentary constituency ka la kiew sha ka 10 ngut.
Haduh mynta ki seng saiñpyrthei kiba la dep pynbna ïa u kyrtong ban ïakhun ïa ka ilekshon MP Lok Sabha ki long ka NPP ïa u Dr. DRL Nonglait, ka VPP ïa u Dr. Batskhem Myrboh, ka UDP ïa u Bah VGK Kynta, ka Congress ïa u Bah Vincent H Pala hynrei kaba sah mynta sa tang ka BJP.
