Shillong, Risaw 06
Uwei u nongjngohkai pyrthei na Utter Pradesh u la hap ban dem ha ki kjat jong ki saw ngut ki kynthei ban panmap hadien ba u la ringdur ïa ki ha ka por ba ki jngi ha ka kshaid Mawsawa kaba don ha Sohra.
Katkum ka durkhih ba la pyllait ha Instagram jong ka lifewithbinita la ïohi ba kine ki kynthei ki la pynpaw ka jingbitar ïa une u shynrang uba la ïeng hakhmat namar ba u la ringdur ha ka por ba ki jngi ban phong da ki sopti lyngkot.
Katkum ka durkhih ha Instagram la pyni ba kane ka la jia ha ka 4 tarik mynta u bnai ha kshaid Mawsawa kaba don ha Sohra.
Ha katei ka account jong katei ka Lifewithbinita ka la batai, katba ki dang ïa jngi bad ïa sngewbha hapoh um kiba don 4 haduh 5 ngut ki khynnah kynthei kaba dei ka kynhun jong ki, la ïohi ba uwei na ki nongjngohkai pyrthei u dang ringdur bad haba kawei na ki, ki la ïakynduh ïa u, u la kyntait ba u la ring ïa ka durkhih.
“Ngi la shim ïa ka phone jong u bad ngi la peit ïa ka bad ngi la lap ba ki don 9-10 tylli ki dur bad ki durkhih kaba ba la buh ha ka phone jong u,” ka la pynpaw.
Ka la pynpaw ba une u briew uba la leh ïa kane ka kam bymman um shym la panmap hynrei u ai daw pynban ba ka kti jong u ka kum btuit namar ba ka sngem um.
Ka la ong ba ym don mano mano ba don hok ban ringdur ïa ki briew khlem ka jingmynjur jong ki, khlem da burom ïa kaei kaba ki phong.
Kumta ka la kyrpad ïa baroh ka long ban ïasam ïa kane ka khubor katba lah khnang ba kiwei kin tip ïa kaei kaba jia bad tip ba kum kane ka jingleh ym dei ban shah bad lada lap ïa kaei kaei kaba kum kane, sngewbha kren bad ïeng pyrshah ïa ki briew ba mut ban pynjah burom.
