Shillong, Risaw 06
U Myntri Rangbah ka jylla u Conrad K. Sangma u la ong ba kan nym don shuh ka jingtih thliew khnai ïa u dewïong ha Meghalaya bad ka sorkar ka dang ïatreilang bad ka sorkar pdeng ban pynduna ïa ka jaka ba ai wai ïa ki marpoh khyndew sha ka 5 haduh 10 hectare khnang ba ki nongtih dewïong kiba rit kin lah ban treikam katkum ka jingstad saian.
U Conrad u la ong ba ma u ryngkat bad ka MLA na Sutnga-Saipung ka Kong Santa Mary Shylla ki la ïakynduh ïa u Myntri ba dei peit ïa u dewïong ka sorkar pdeng khyndiat bnai mynshwa bad ki la tyrwa ban pynduna ïa ka jaka ai wai na ka 100 hectare sha ka 10 hectare hapoh, lada long kaba lah sha ka 5 hectare.
“Ka sorkar India ka la long kaba pdiang ïa kane ka jingtyrwa bad ki la thaw ïa ka komiti. Ka komiti ka la ïakynduh lai haduh saw sien mynta bad nga la ïakren bad ka komiti bad ki dkhot kin sa wan shen sha Meghalaya ban ïakren shuh shuh bad ki nongshim bynta bapher bapher,” u la ong.
U la ban jur ba la shah ban tih dewïong ha ka jylla bad la weng noh ïa katei ka jingkhang ha u snem 2019.
“Ïa ka jingkhang la weng noh ha u snem 2019 ryngkat bad ka kyndon ba phin hap ban bud ïa ka aiñ MMDR kaba dawa ïa phi ban leit sha ka jingtih dewïong kaba lait. Ka jingsngewkhia ka long ka jingshngaiñ jong ki nongtih dewïong bad ka jingshngaiñ jong ka mariang,” u la bynrap.
U Myntri Rangbah u la kren shai ba ym lah ban pynim biang ïa ki rukom leh barim.
“Lada phi kren ban leit phai biang sha ki rukom barim jong ka jingtih dewïong da ki thliew khnai, kata kan ym jia namar dei thik na kata ka daw ba la buh ïa ka jingkhang. Ka sorkar ka la kren shai bha ba ka jingshngaiñ jong ki nongtih dewïong bad ka mariang ka long kaba kongsan tam na ka bynta ka Sorkar India, ka Supreme Court bad kumjuh ruh ka NGT,” u la ong.
U la ong biang, halor ka jingpynsuk ïa ki kyndon na ka bynta ki nongtih dewïong kiba rit, u la ong, “Ka jaka ka lah ban hiar sha ka 5 ne 10 hectare hynrei ki buit bad ka rukom treikam kin dang hap ban bud ïa ka rukom treikam jong ka saian.”
