Shillong, Risaw 06
U Myntri Rangbah ka Jylla bad National President ka NPP, u Conrad K. Sangma, ha ka Sngi Ba-ar u la kyntait ïa ki khubor ba bun ngut ki MLA ka NPP ki dang wad lad ban pynïasoh sha ka BJP, da kaba kren shai ba ka Sorkar MDA-II hapoh ka jingïalam jong u, ka long kaba skhem.
Haba kyntait ïa kitei ki khubor kum ki bym don nongrim, u Conrad u la ong, “Kine kim dei eiei hynrei ki hamsaïa bad tang ki jingmutdur na ki katto-katne ki bynta.”
“Kine ki la long tang ki jingmutdur kiba ki briew ki shu pynsaphriang bad ban poi sha ka rai da kaba pyrshang ban mutdur ïa ki jinglong-jingman bapher-bapher kiba mih. To ngan khylliap noh ïa kane ka kam da kaba kren shai ba kine kim dei eiei-eiei hynrei tang ki hamsaïa,” u la ong.
U Myntri Rangbah u la ong ruh ba ki don katto-katne ki bynta bad ki lad pathai khubor kiba la pynmih ïa kum kine ki jingsngewkhia.
“Ki katto-katne ki jingsngewkhia, lehse ki lad pathai khubor ki lad thaw, bad ki ‘riew shimet ki la thaw, hynrei ngan pyntikna ïa ki MLA, ka Kynhun Synrop bad ki paidbah ba bun balang – ba kam don kaba kum kata ka jingpyrkhat bad kam don eiei kaba sngewkhia ha kaba ïadei bad kane ka kam,” u la ong.
U Conrad u la pynskhem ruh ba ka Sorkar MDA ba la ïalam da ka NPP ka long kaba skhem.
“Shisha, ka Sorkar MDA-II ka long kaba skhem bha. Ka NPP hi dalade ka don 33 ngut ki MLA kiba ïatylli mlon kawei bad ngi don ruh ïa ki paralok ha ka Kynhun Synrop jong ngi”, u la ong.
U la ong ba ka jingkhlaiñ (baroh kawei) jong ka Kynhun Synrop ka ïaineh kumjuh wat hapdeng ki jingkylla ha ka jinglong-jingman hapdeng ki seng ba ïateh lok.
“Ka jinglong-jingman baroh kawei ka lah ban kylla hapdeng ki seng ba ïateh lok hynrei ka jingkhlaiñ jong ka MDA ka dang neh kumjuh bad ka jingkular kaba don hangta na ki paralok bapher-bapher ka dang sah kumjuh bad kumta ki la don ki jingeh hapdeng ar tylli ki seng ba ïateh lok – kiba dei ki kam poh ïing jong ki ar tylli ki seng, hynrei kata kam shym la ktah satia ïa ka jingdon paid baroh kawei ne ka jinglong skhem jong ka Sorkar MDA-II,” u la bynrap.
