Mairang, Risaw 06
Ka ophis jong ka District Medical and Health Officer (DMHO) West Khasi Hills District, ha ryngkat ka jingïatreilang bad ka ophis jong ka Deputy Commissioner (DC) ka Eastern West Khasi Hills District, ha ka sngi Ba-ar jong ka taïew ka la pynlong ïa ka jingïaid paidbah halor ka ‘National Tobacco Control Programme’ kum shi bynta jong ka jingrakhe ïa ka World No Tobacco Day 2026 halor ka phang “Unmasking The Appeal -Countering Nicotine and Tobacco Addiction.”
Ïa kane ka rally la sdang na ka ophis ka Deputy Commissioner ha Mawsawa bad la ïaid ter ter ka surok bah NH-44E bad la pynkut noh ha Tirot Sing Memorial Hall Pyndengumiong, Mairang da ka jingïalang.
Ka jingthmu jong kane ka prokram ka long ban pynsngewthuh paidbah bad pynshai halor ki jingma bad ki jingpang kiba shyrkhei kiba mih na ka jingdih bad ka jingbam duma kum ka jingpang bampong (cancer), jingpang klongsnam, bad kiwei.
Shuh shuh ha kane ka rally la wan shim bynta da ki khynnah na ki skul bapher bapher jong ka District, ki nongtrei ka koit ka khiah, bad ki riew paidbah ki la ïasnohkti lang ha ryngkat bad ki placard kiba don ïa ki jingthoh ban kyntu ïa ki paidbah nongshong shnong ban iehnoh ïa ka jingbam bad jingdih duma.
Ka Deputy Commissioner ka Eastern West Khasi Hills Kong Anita Kharpor haba kren kum ka kongsan, ka la ong ba ka jingktah na ka jingbam ne dih ïa u duma, ka long kaba shyrkhei bha bad kine ki prokram kiba la pynlong ban ïaleh ban pynduh jait ïa ki jingkyrni na ka jingdih bad bam duma ka la ïaid mynta la bun bun snem.
Ka la pynpaw ba ki la don bun ki prokram ai jingpynshai bapher bapher kiba la pynlong ban rat dyngkhong ïa kane ka jingkyrni basniew ha kaba ka la ïarap ban pynsngewthuh ïa ki paidbah bad la ïohi ba ka la don ka jingkylla ha ki briew ban ieh ïa u duma bad kane ka la long ka nuska ïa kiwei pat la ha ïing ne ha shnong ha thaw ban ïarap ban pynsngewthuh ïa ka jingma kaba ap na kaba pyndonkam ïa u duma.
Kala kyntu ruh ïa ki khynnah skul ba kin pyndonkam ïa ka jingnang jingtip kaba ki ïoh na kum kine ki prokram ban kren sha kiwei pat ki paramarjan, kiba haïing hasem, ki paralok kiba ju mlien ban dih duma ba kim bit ban dih duma ha ki jaka paidbah, kali paidbah namar ba ka ktah ym tang ïa ki hynrei ïa kiwei ruh.
Shuh shuh ha kane ka sngi la pynbud pat da ka jingïalang ba kyrpang ha Tirot Sing Memorial Hall Pyndengumiong, ha kaba la wan ban ïadon lang ka DC Kong Anita Kharpor kum ka kongsan, u Superintendent of Police EWKHD Bah GW Lyngdoh, ka State Nodal Officer NTCP and NOHP ka Dr. N Mawrie, ka District Nodal Officer ka Dr. LL Mawsor, kiwei ki ophisar Sorkar, ki doctor ha ryngkat ki khynnah skul bad ki nonghikai.
Ha kane ka prokram la sam ruh ïa ki khusnam sha ki nongjop ha ka jingïakob thoh Slogan bad ka TVF Initiative Competition jong ki skul kaba dei shi bynta jong kane ka prokram.
