Shillong, Risaw 06
U Bah Seiborlang Warbah, MDC ka Mawkynrew Konstitwensi ha ryngkat ki nongshong shnong ka Rapleng ha ka sngi Ba-ar jong ka taïew, ki la leit ban ïakynduh ïa u Executive Engineer PWD, namar ka jingjot sha ba palat ka surok ha Rapleng.
Haba kren sha ki lad pathai khubor u Bah Seibor u la ïathuh ba kane ka surok ka la jot rathai mynta la don kumba 3 snem, kumta u la ong ba na ka liang u EE u la ong ba ki dang ap sa tang ïa ka mang tyngka na ka Sorkar ban shna noh ïa kane ka surok.
U la ong ba lada ka surok ka bha ki nongshong shnong ba don sharum ka shnong Rapleng, kin bun kiba ïaid na katei ka shnong hynrei namar ka jingsniew palat ka surok bun ki bym ïaid nangtei mynta.
“Ngi wan kynduh ïa u EE tang ban sngewthuh, ba ki la leh kumno na ka bynta katei ka surok ha Rapleng kaba la sniew sha ba palat. Ngam lah ban shu peit ban ïohi ba ka surok ha shnong, kadei ka surok kaba sniew sha ba palat,” la ong u Bah Seiborlang.
“Ngi kyrmen ba lada ka Sorkar ka shimkhia lem ban weng ïa ka jingeh ki nongshong shnong, ngi sa ïohi noh ïa ka jingbha ka surok ha Rapleng,” u la ong.
Shuh shuh u la ong ruh ba kane ka surok mynta ka la dap la 3 snem kynthih ba ka sniew sha ba palat.
