Shillong, Risaw 06
U Myntri Rangbah ka Jylla Conrad K Sangma u la ong ka jingkhrong pisa beaiñ na ki trok ka dei kaba ym lah ban pdiang satia, hynrei ban shim ïa ki lad pynshitom kiba tyngeh dei ban hap pynshong nongrim kat-kum ki sabut ym tang da kaba shu kynnoh.
Haba kren ha ka sngi Ba-ar halor ka jingkynnoh khrong pisa beaiñ, kaba la sei madan da ka Khasi Students’ Union (KSU), u Conrad u la ong, ka Sorkar ka long shai kdar ba kum kitei ki jingjia kim dei ban jia satia.
“Peit ngi long kiba shai kdar ba ha kum kine ki jinglong jingman, ïa ngi hi, ngi kwah ban pynthikna ba ym dei ban don kum kitei ki jingleh ba kin jia bad dei ban leh da kaba tyngeh. Namar-kata na ka bynta jong ngi, ngi ïengskhem bad long shai bha halor katei,” u la ong.
U Conrad u la ban jur ba ka Sorkar kam lah ban leh eiei lada ka dei kaba la pynshong nongrim tang ha ki jingkynnoh.
“Ha ki jingjia kiba kum kitei, ngi donkam ban treikam halor ki sabut kiba paka bad ngim lah ban ïaid tang halor ki jingkynnoh, namarkata, dei ban pynshong nongrim ïa kaei kaba ngi dei ban leh da kaba tyngeh,” u la bynrap.
U Conrad u la pynthikna ba la dep ban shim ïa ki lynti kiba tyngeh haba ki ïoh ïa kino kino ki jingtip ïa kum kitei ki jingleh kiba la pynsngew sha ka Sorkar bad yn shimkhia ruh wat ha ki por ban wan.
“Nga pynthikna ïa baroh, haba ngi lap ïa kino kino ki jingjia, haba don kano kano ka jingjia, kino kino ki jingtip kiba wan sha ngi, ngi la leh da kaba tyngeh. Ha ki por ban wan ruh, lada donkam, ngin leh da kaba tyngeh,” ong u Conrad.
“Ngi hap ban pynthikna ba baroh ki jingshisha bad ki jingtip ki dei kiba hap ban bishar bniah, baroh ki sakhi bad ki sabut ki dei ban don bad haba mih kano kano ka jingjia, ngi la leh da kaba tyngeh. Kumta yn ym don mano mano ruh kiban lah ban shu poi beit sha kaba kut bad ban ong ba katei kala jia. Ngi hap ban trei katkum ki sabut bad ki sakhi bad kumba nga la kdew, ba ngi long kiba shai kdar ha ka nongrim kaba ngi ïeng ha kaba ïadei bad kine ki jingleh ïa kitei ki jait kam ïa kaba ngin ym ailad, lada ngi lap ïa kum kitei ki jingleh ba ki jia, ngin leh da kaba tyngeh,” u la bynrap.
