Shillong, Risaw 06
U Myntri Rangbah ka Jylla u Conrad K Sangma ha ka sngi Ba-ar u la ong ba ka Sorkar ka la buh ïa ki Police Outpost ha baroh ki jaka ba hap ha Meghalaya ha shilynter khappud ka Assam bad kiwei pat ki dangdon ha ka jingpynkhreh.
Haba kyntait ïa ki jingkynnoh ba ka Sorkar kam shym buh jingpahara ha khappud, u Conrad u la ong ” Kata ka long kaba bakla lut”.
“Ha baroh ki jaka ha kano-kano ka jaka ba danghap hapoh ka jingkmih ka Sorkar, ngi la buh ki Outpost. Don kiba dangïaid shakhmat ha ki katto-katne ki jaka, don ki jaka ba ngi dangpynthikna bad don ki jaka kiba ngi la sdang ,” u la ong.
U la ong ruh “Ngi la buh bun ki Outpost ha ki khappud bad ngi dang buh shuh shuh. To sngewskhem, ngin pynthikna ba ha kine ki jaka baroh kiba don hapoh ka jingpeit jong ka Meghalaya, yn shim ïa ki sienjam ban pynbiang ka jingïada bad jingdonkam ki paidbah nongshong shnong”.
