Jowai, Risaw 07
Ki pulit ka West Jaiñtia Hills kila pynbna paidbah ban pyntreikam da u QR Code ban pynsuk ban pyntip ïa kino-kino ki kam beaiñ ne ki kam runar khlem da pynpaw ïa ka kyrteng jong ki nongujor.
Ha ka kyrwoh u Superintendent of Police (SP) ka West Jaiñtia Hills u la ong, u QR Code kan pynsuk ban ai jingtip ïa kino-kino ki kam beaiñ ne ki kam runar, ka jingwan rung beaiñ jong ki briew sha ka Jylla, ne ka jingleh bym suidñiew jong ki pulit ne kiwei-kiwei ki kam kiba donkam ïa ka jingshimkhia jong ki Pulit.
La kyntu ïa ki paidbah nongshong shnong ban scan bad pyndonkam ïa u QR Code ban ai ïa ki jingtip ne ki jingujor khlem da pynpaw kyrteng. Ïa ka jingtip jong ki nongujor yn buhrieh. Ki pulit ki la pan jingïatreilang na ki paidbah ha kaba pynneh ïa ka suk ka saiñ bad ban pynthikna ïa ka jinglong jingman kaba shngaiñ na ka bynta baroh, la ong ka kyrwoh.
