Nongstoiñ, Risaw 07
U President ka Voice of the People Party (VPP) State Youth Wing u la ong, ka jingthmu jong u MLA ban ai ïa ka ejahar (FIR) ka long beit ban pyntieng ïa ki samla, ki paidbah kiba shaniah ïa ka VPP ba kin mih shakhmat.
U Bah Marbud Dkhar u la kren bad pynpaw kumtei haba kren sha ki nongthoh khubor ha ka sngi Balang hadien ba la dep ban leit sha ka jingshah khot hajir ha ka Inquiry Committee ban tohkit halor ki jingkynnoh kiba ïadei bad ka jingpynrung kam Staff Nurse ka MCH Hospital, Nongstoiñ.
U la ong ruh ba ha kane ka jingshah khot hajir, haba ki la pyrshang ban twad jingmut ha kaba ïadei bad u samla uba la pyntip sha ka VPP State Youth Wing, ki la pan ïa ka kyrteng, ki la pan ïa ka jaka sah, ha kaba u la ong sha ki ba ka VPP kan nym lah ban ai ïa ka kyrteng ka jong u.
“Ngi ong ai shwa ïa ka jingpyntikna, ai ka jingthoh na ka liang jong phi ba kan don ka jingïada ïa utei u samla, namar ngim lah ban shaniah ïa kane ka bor Sorkar bad khamtam eh na ka liang jong ngi, ngi dang ïaleh ban ïakhun ïa ka rukom treikam kaba long palat ha ka bamsap, kumno ngin sei ïa kita ki kyrteng,” ong u Bah Marbud.
Shuh shuh u la ïathuh ba ki pan ïa ki jingpynshisha lane ki sakhi, ki pan ïa ki audio recording, ki pan ïa kita ki receipt ïa kaba ki la ïa shim ïa kata ka pisa 1 lak tyngka ha kito ki por kiba ki ïaleh ïa kane ka kam, te na ka liang jong u, u la kren da kaba shai ban weng noh shwa ïa kato ka FIR kaba la ai da u MLA ka Nongstoiñ Constituency.
U Bah Marbud u la kam ruh ba halor kane ka bynta u SP u ong ïa u ba kam don jingïadei eiei bad kane ka Inquiry Committee.
“Nga la ong balei pat phi thung ïa ka Inquiry Committee, balei u MLA u ai FIR, ngi sngewthuh shai ba u MLA u ai FIR ka long beit ban pyntieng ban pynsangeh ïa ki paidbah lane ki khun samla khamtam na WKH ïa kaba kiba bun kiba la sdang ban mih ban pyntip sha ka VPP ïa ka jinglong kynrum kynram ha kaba ïadei bad ka thungkam thungjam kam ‘staff nursing’,” u la ong.
U Bah Marbud u la kam ruh ba ym dei tang ha ka kam ‘staff nurse’ hynrei ha ka DSC ruh kiba bun ki samla ki la sdang ban mih shakhmat, ka jingthmu u MLA ban ai ïa kato ka FIR ka long beit ban pyntieng ïa ki samla kiba shaniah ïa ka VPP ba kin mih shakhmat.
“Na ka liang jong ngi, ngi kren da kaba shai ba kane ka dei sien kaba khatduh ba ngin wan namar ba ka rukom tohkit ïa ngi kala long noh kumba tohkit ïa kito ki briew kiba leh ïa ki kam sniew, ka rukom kylli jingkylli, ka jingpynslem ban kylli jingkylli ka jingpynkyllain hangne hangtai bad ka jingthmu ka jong ki ka long beit ba ki kwah ïa uto u samla uba la mih shakhmat ban ai ïa ka jingtip sha ngi,” ong u Bah Marbud.
