Shillong, Risaw 07
Haba kam ba ka don ka jingtyrwa ban phet seng, u Nongïalam ka BJP bad MLA ka Pynthorum-khrah Bah AL Hek ha ka sngi Balang u la ong, ki MLA na rilum Garo bad Khasi, kynthup ïa kito kiba na ka NPP, ki long kiba kloi ban rung sha ka BJP hynrei kim don ïa ki nombor kiba biang ban lait na ka aiñ kyntiap seng (anti-defection law).
Halor ki khubor hamsaïa ba ki MLA ka NPP ki kwah rung BJP, u Bah Hek u la ong, “Man ki seng saiñpyrthei khlem da kheiñ ïa kano-kano ka seng ki donkam ban lum hajuh ïa la ka kynhun. Lym kumta ka kynhun jong ki ruh, ki ïai ïakren ïa ngi ban ïasoh bad ka BJP hynrei tang kawei ka long ba kim don ïa ki nombor, dei na kata ka daw ba kim lah ban ïasoh namar ki hap ban ïaid lyngba ka aiñ kyntiap seng.”
U Bah Hek u la ïathuh ba man ka sngi u ïoh bun tylli ki ‘phone call’. “Nga ju ïoh ym duna ïa ka saw-san tylli ki ‘phone call’ na ki bynta bapher-bapher jong ka jylla Meghalaya. Don kiba phone na rilum Garo Hills, na Sohiong, West Khasi Hills, Jaiñtia Hills, Ri-Bhoi. Man ka sngi nga ïoh saw-san tylli ki phone call bad kine ki briew ki kwah ban rung sha ka BJP da ka kynhun,” u la ong.
Ka jingkhang jong ka BJP ka plie, u la ong, “Ngim don jingeh satia namar ka jingkhang jong ka BJP bad kito kiba kwah ban rung sha ka BJP ki long kiba la pdiang sngewbha bad ngi don hangne ruh ban ïatreilang bad ki.”
Haba ban biang ba ki MLA ba mynta ki la don ha ka jingïakren, u la ong, “Nga la ïoh ki phone call na ki MLA ba mynta na rilum Garo, na baroh ki seng saiñpyrthei bapher-bapher hynrei ka mat ka long ba kim don ïa ki nombor ban phet seng. Nga ong ïa phi ba ki long kiba la pynkhreh hynrei lada kim don ïa ki nombor ban kiar na ka jingshah mait kyrteng kan long ka jingeh. Nga ong biang ïa phi ba ki MLA kiba dei na ki seng saiñpyrthei bapher-bapher na rilum Khasi bad Garo ki la long kiba khreh ban rung BJP.”
Haba kren shaphang ka bor bad ka jingsngew sarong, u Bah Hek u la ong, “Ka bor kan wan bad ka bor kan leit, ka bor kam lah ban neh slem. Phin ïohi ba ka bor ka don beit bad phin sa ïohi ruh ba ha ki katto katne snem ba kan don ka jingphet seng. Kumta ngim dei ban bat skhem ïa ka bor baroh shilynter, ka bor kam dei ba phi lah ban im junom. Ban im junom ka long ban im na ka bynta ka jinglong briew, phi hap ban burom ïano-ïano ruh hangta phin don bad im ha ka bor.”
“Ka jinglong ba sngew sarong, ka jinglong bym khih, phin nym lah ban neh ha ka bor. Ngi la ïohi ïa kiba bun ki nongïalam ha ki por ba la leit noh kiba sngew sarong palat, kiba shim sting palat, kiba sarong, ngi la ïohi ïa ka jinghap noh jong ki ruh. Kata kaba nga la shem ha kine ki 30 snem ha ka saiñpyrthei. Nga la ïohi ïa baroh kiba ki khot ïa ka jingshisha ne ka drama ne ka theatre ruh. Nga ruh nga dei uwei na ki aktor ha ka drama,” u la ong.
Haba pynshai, u Bah Hek u la bynrap, “Ngam ong ba ka jingsarong kam dei ka seng, ka jingsarong ka dei tang shimet. Balei phi kynnoh ïa ka seng? Ym don ka seng kaba sarong. Ngam kynnoh la ka dei ka Congress ne ka BJP ne ka TMC, ne ka NPP ne ka UDP. Ym don ka jingsarong ha ka liang ka seng, ka jingsarong ka dei shimet shimet.”
“Ka dei kaba ju jia bad ngim lah ban kiar na ka. Nga la ïohi ïa ka Sorkar UPA ha ka bor, ngi la ïohi ïa ka Sorkar NDA ha ka bor, ngi la ïohi ïa kiba bun ki Myntri Rangbah kiba don ha ka bor, ki don hangto tang katto katne por bad kim lah ban synshar junom. Dei na kata ka daw ba ka bor ka don bad kumjuh ruh ka jingpyrshah ïa ka jingsynshar ka don beit. Phim lah ban ong ba kin synshar junom,” u la ong.
