Shillong, Risaw 07
U nongïalam ba rangbah ka BJP bad MLA ka Pynthorumkhrah, u Bah A.L. Hek ha ka Sngi Balang u la pynïasoh ïa ka jingnang kiew jong ki kam runar ha ka Jylla bad ka jingkynrei jong u drok bad ong ba ka Sorkar MDA ka dei ban shim ïa ka jingkitkhlieh kaba pura ban rat dyngkhong ïa une u jingdih pynbuaid.
“Ki don shibun ki kam runar kiba jia namarba ki briew ki pyndonkam ïa u drok. Ka dei ka jinglong-jingman kaba ima,” la ong u Bah Hek.
“Kum ka Sorkar MDA, u Myntri Rangbah bad u Myntri ka Koit ka Khiah ki dei ban shim ïa ka jingkitkhlieh halor kumno ban tehlakam ïa kane ka mat haba ïadei bad u drok kaba jia na ka por sha ka por. Ym tang kawei ka longïing mynta, bun ki longïing bad ki kmie ki kpa ki shem jynjar haba ki ïohi ba uwei na ki dkhot jong ka longïing jong ki u ngop ha u drok. Kumta ka la kylla long ka jinglong-jingman kaba i-shyrkhei ïa ka imlang-sahlang jong ngi kaba ngi shong ngi sah. Dei na kata ka daw ba bun ki kam runar ki ju ïai jia,” u la ong.
Une u nongthaw aiñ u la ong ba ïa kane ka jinglong-jingman lah ban sakhi ha kylleng ka Jylla.
“Ki don shibun ki kam sniew kiba jia ha Meghalaya. Ngi la ïohi dang shen ba ka dang jia ha Nongmensong, ka konstitwensi jong nga, kiwei-kiwei ki konstitwensi bad kiwei-kiwei ki bynta jong ka Meghalaya. Kumta kane ruh ka dei kawei na ki dawbah na ka jingkiew jong ki kam sniew lyngba ka jingkynrei ki kam dih drok,” u la ong.
Haba kylli kaei kaba dei ban leh, u Bah Hek u la ong, “Ka Sorkar ka hap ban shim ïa ka jingkitkhlieh kaba pura ban pyntikna kumno ban pynduh jait ïa ka jingeh ba ïadei bad u drok ha ka Jylla Meghalaya.”
Haba ai jingmut ïa ki lad ki lynti ban shimkhia ha ka kyrdan jong ka imlang-sahlang, u la ong, “Ki sienjam kiba ngi ai jingmut ki long ba lada ngi ïatreilang bad ka Dorbar Shnong, ki nongtrei mon sngewbha jong ka Dorbar Shnong, lada ngi lap ïa kino-kino kiba thaw jingkulmar namar ka jingdih drok, ngi dei ban shim ïa ki lynti kiba donkam bad ngi hap ban ïakhun pyrshah ïa ka jinglong-jingman. Ngam ong ban pynshitom ïa ki, hynrei ban pyntikna ba kin ym mlien ne ngop biang ha kine ki jingdih ba kyrni.”
“Ngi hap ban phikir bha namarba ma ki ruh, tang namar ka jingïadei paralok, ki kylla long ne ngop ha ki kam dih drok ha ka Jylla Meghalaya. Kumta ngim lah ban kynnoh ïano-ïano ruh, hynrei ka dei ka kamram kum ki kmie ki kpa kiba don ka jingkitkhlieh bad ki nongshong shnong kiba don ka jingkitkhlieh lem bad ka Sorkar kaba don ka jingkitkhlieh ban tehlakam ïa kane ka jingkyrni dih drok bad ruh ban khanglad shi syndon ïa kane ka kam runar kaba donkti da ki nongdih drok,” u la ong.
