Nongstoiñ, Risaw 07
Ki ar ngut ki nongïalam ka Voice of the People Party (VPP) State Youth Wing ba kynthup ïa u Bah Marbud Dkhar, Presi -dent bad Bah Nathaniel Mawrie Secretary, ha ka 7 tarik mynta u bnai ki la shah khot hajir hakhmat ka Inquiry Committee kaba la thaw ban tohkit halor ki jingkynnoh kiba ïadei bad ka jingpynrung kam jong ki Staff Nurse ka MCH Hospital, Nong-stoiñ,
Ha kane ka sngi shah khot hajir, ïa kitei ki ar ngut la synran lang da u Bah Powell Sohklet, MDC ka Mawthadraishan, u Dr. Juristman Iaw-phniaw MDC ka Nong-stoiñ, ka Kong Philita Syiem, President VPP State Women Wing, Bah Robert Wahlang Secre-tary VPP Youth Wing WKH, Bah Khlainbor Kharbani, organising VPP Youth Wing WKH bad kiwei-kiwei ki nongkitkam ka VPP.
U Bah Marbud Dkhar haba kren bad ki nongthoh khubor u la ong, ka jingkhot hajir ka long halor ka mat kaba ïadei bad ka kam ‘staff nursing’ hapoh MCH Nongstoiñ bad kumba la ïohi ba la mih ha ki lad pathai khubor ba kala don ka jingkynnoh bad sei ruh ïa kito ki kyrteng jong ki ar ngut ki briew, ha kaba u la kam ba ki ïa donkti ban ïa dawa pisa ha kaba ïadei bad ka thungkam thungjam ha ka kam nursing.
“Ngi la ïoh ïa kato ka shithi ngi la wan, kaba nyngkong ka long ban ïatreilang bad ka bor district jong ka West Khasi Hills District,” u la ong.
U Bah Marbud u la ong, “Haba ngi la rung hapoh ka kamra, ka Inquiry Committee bad la kylli nyngkong, kaba nga sngewdap da ka jingsngew lyngngoh ba ki kylli ki pan ïa ka kyrteng jong u samla, uba mih shakhmat uba shaniah ïa ka VPP State Youth Wing bad uba phone ïa ngi, shuwa ban don ka interview ha ka 29 bad 30 tarik jong u bnai ba la lah ha kaba ïadei bad ka kam ‘staff nursing’ hapoh MCH Nongstoiñ, ba ka don ka jyrsieh bamsap kaba shyrkhei.”
U Bah Marbud u la kam ba utei u samla u la ïathuh lut ïa ki kyrteng khamtam ba u la pynmih ïa ar ngut kito ki kyrteng ba ki donkti ba ki dei kita ki briew ba ïajan eh jong u MLA ka Nongstoiñ ba ki dawa lane ki pan pisa na ki khynnah kiba mut ban leit leh ïa ka interview.
U la ong ruh, “Nga la kylli ïa ki dkhot ka Inquiry Committee ba hato ki la khot ne em ïa kito ki ar ngut kiba la mih lane paw kyrteng, hynrei ki la jubab ba kim pat khot bad nga la ong ba balei pat phi khot ïa ngi haba ïa kine ki briew kiba la donkti, ba la paw kyrteng shabar ym pat khot.”
Shuh shuh u la ong, “Nga ai ka jingïaroh ïa ki samla napoh WKH kiba la mih shakhmat ban pyntip sha ka VPP, lada ngi, ngi pyntip noh sha ka Sorkar, sha ka Inquiry Committee, ngin sei noh ïa ki sakhi lane ki jingpynshisha, ngin sei noh ïa ki audio u paidbah un ong kumno, ngin shet kylla noh ïa u paidbah ka mut kala kut namar kane ngi shim ba ka dei ka jingïaleh ka jong ngi, ngin nym sngewpher ba ki khot ïa ngi kumne, namar ngi sngewthuh ba ka jingïakhun ka jong ngi ka dang bun nangne shakhmat, ka jingïakhun na ka bynta ka ri bad ka jaidbynriew ka jingïaleh ïa ka hok jong ki khun samla ki jong ngi.”
U Bah Marbud u la kyntu ïa ki samla ba kim dei ban tieng kim dei ban salia ha kaba ïadei bad kine kiei kiei baroh, lada don eiei sha lyndet mih beit shakhmat, pyntip sha ka VPP State Youth Wing bad shaniah ïa ka Youth Wing jong ka VPP namar da lei lei kan nym shet kylla bad kan nym ai ïa ki kyrteng khlem ka jingïada.
Shuh shuh u la kyntu ruh ïa ki briew kiba ju mlien ba kin kiar na ki jingkynthoh, ki jingpynmih video, ki jingdro dur ïa ki nongïalam jong ka seng khamtam ïa u Bah Ardent bad u la bynrap ruh “Mynta ki pyndonkam ïa ki account thok ha ki social media bad ngi tip ki dei na kynhun jong no ki dei na ka party jong no, kumta na ka liang ka VPP ka maham tyngeh.”
