Shillong, Risaw 07
Ka Kynhun Myntri ka Sorkar Jylla ha ka sngi Balang kala ai jingmynjur ïa ka jingtyrwa ban pynjlan biang sa 6 bnai ïa ka samoi treikam ba mynta jong ka Garo Hills Autonomous District Council (GHADC), kaba rah ïa ka ilekshon shaduh u bnai Ïaïong 2027.
Ka jingpynbna ba 6 bnai jong ka sien ba nyngkong kan kut ha ka 17 tarik Risaw. Da ka rai ha ka sngi Balang, ka Sorkar kala pyndonkam lut ïa ka shisnem ka jingpynjlan kaba long katkum ka aiñ.
Haba kren sha ki lad pathai khubor hadien ba la wai ka jingïalang jong ka Kynhun Myntri hapoh ka jingpynïaid u Myntri Rangbah Conrad K Sangma, u nongaiktien ka Sorkar MDA bad Myntri Sorkar Bah Wailadmiki Shylla u la ong, “Ka don tang kawei ka mat ba ïakren, ka jingpynjlan ïa ka samoi treikam ka GHADC ba 6 bnai na ka bynta ban pynlong ïa ka ilekshon”.
U la ïathuh ba ïa ka ilekshon ym shym la lah ban pynlong kham hashuwa namar ka jingsniew ka jinglong ka suk ka saiñ ha ri-lum Garo. “Kumba phi tip, namar jong kato ka jingjia kaba sngewsih kaba jia ha ri-lum Garo, ngim shym la lah ban pynlong ïa ka ilekshon bad ngi la pynjlan ïa ka sa 6 bnai,” u la ong.
Ka jingpynslem, u ong ka don jingïadei bad ka jingphiah thymmai ïa ki constituency bad ka Special Intensive Revision (SIR). “Namar ngi hap ban leh ïa ka jingphiah constituency bad SIR, bad ka kam ka dang ïaid mynta, bad ka 6 bnai ba hashuwa kan kut noh ha ka 17 tarik Risaw, ngi hap ban pynjlan biang sa shisien,” ong u Bah Wailad.
“Ka don ka kyndon kaba ngi lah ban pynjlan ïa ka ilekshon haduh shisnem, kata 6 bnai bad 6 bnai. Haba buh hakhmat ïa ka jingphiah constituency kaba dang ïaid bad ka ban sa pyndep shen, mynta ka sngi, ka Kynhun Myntri kala mynjur ban pynjlan biang sa hynriew bnai,” u la ong.
