Shillong, Risaw 07
Ka Salesian Province jong ka St. Paul-II, Shillong ka la rakhe ïa ka jingdap 50 snem bad 25 snem ka jingshakri niam jong ki 14 ngut ki Lyngdoh riewniam da kaba pynlong ïa ka Mass bakhuid ha ka ïingmane St. Peter & Paul ba ha Pynthorumkhrah Shillong ha ka sngi Balang.
Kane ka jingrakhe ka long ka dak jong ki mawjam ha ka jingpynkyntang Lyngdoh bad ka kam riewniam, da kaba ithuh ïa ki phew snem ka jingaiti jong ki ha ka Salesian bad ka jingshakri jong ki ïa ka Balang bad ïa ka imlang sahlang.
U Fr. U John Kalapura bad u Fr. U Isaac Mattappillil ki la rakhe ïa ka Diamond Jubilee ka jingkyntang Lyndoh jong ki, kaba pynpaw ïa ka jingdap 60 snem jong ka jinglong Lyngdoh, katba u Fr. Roland Kharkrang bad u Fr. Edmund Gomes ki la rakhe ïa ka Jubili Ksiar jong ka jingpynkyntang jong ki, da kaba pyndep ïa ka jingshakri Lyngdoh kaba 50 snem.
U Fr. Devasia Vazhayil, u Fr. George Palamattathil, u Fr. Philip Barjo bad u Fr. Thomas Pampaddiyil ki la rakhe ïa ka Jubili Ksiar jong ki ha ka kam niam, kaba pynsah kynmaw ïa ka jingdap 50 snem jong ka jingaiti ha ka jingim riewniam jong ki ha ka seng Salesian.
Ïa kane ka Jubili Rupa jong ka jingpynkyntang la rakhe da u Fr. Kenny Pakma, u Fr. Stephen Kharbani bad u Fr. Sylvester Synrem, kiba la pyndep ïa ki 25 tylli ki snem ka jinglong Lyngdoh. U Fr. Dominic Ngul T T, u Fr. Micheal Makri bad u Fr. Remol Marak ki la rakhe ïa ka Jubili Rupa jong ki ha ka kam shakri niam.
Haba kren ha kane ka sngi u Fr. Edmund Gomes u la pynpaw ka jingsngewnguh ïa u Blei na ka bynta ki sanphew tylli ki snem jong ka jingim Lyngdoh bad u la ai khublei ïa ki para Lyngdoh, ki nongshong shnong, ki paralok bad ki nongkyrshan kiba la kyrshan ïa u ha shilynter ka jingshakri jong u ïa ka Balang.
Haba pynkynmaw biang ïa ka jingshah khot jong u, u la kynmaw burom ïa ki briew bad ki jingjia kiba la pynwandur ïa ka jingshakri niam jong u. U la kren ruh shaphang ki jingduna kum u briew, ki jingeh ha ka jingshakri bad ka bor kaba donkam ban ïaineh ha ka jingkhot jong u.
Kane jingrakhe ka la lum lang ïa baroh ki nongkyrshan bad ki riewngeit ha ka jingainguh, ban burom ïa ki bun tylli ki snem jong ka jingshakri jong ki bad ka jingaiti lut jong ki ha ka jingim kum ki riewniam.
