Shillong, Risaw 07
U MLA ka Mawryngkneng Constituency u Bah Heavingstone Kharpran ha ka sngi Balang u la leit ban jurip ïa ka jaka ba la buh ïa ka Temporary Police Checkpoint ha Diengpasoh ha ka jingïadonlang ki dkhot ka Executive Committee jong ka Dorbar Shnong Diengpasoh.
Kane ka jingjurip u MLA ka thaiñ kadei hadien ba la mih ka jingkhuslai ki paidbah halor ka rukom treikam jong ki pulit ha katei ka jaka. U Bah Kharpran u la pynpaw ka jingsngewkhia bad jingsngewbitar kaba jur halor kane ka jingjia bad u la maham tyngeh ruh ïa u Officer-in-Charge ka Diengpasoh Police Checkpoint u Binode A Bamon ba kum kine ki jingjia kim dei shuh ban jia biang nangne shakhmat.
U la ban jur ba ka jingtreikam jong ki pulit ka dei ban long kaba shai, kaba katkum ka aiñ bad kaba don jingkitkhlieh, khnang ba ki paidbah kin don jingshaniah ha ki pulit. U la pynkynmaw ba la bunsien u la pynpaw ïa ka jingsngewkhia halor ka jingñiah kali khlem akor bad jingpynher sted kumjuh ki jingjia aksiden ha ka surok bah.
U Bah Kharpran u la kyntu ïa ki pulit ba kin pynleit jingmut ban pynjur ïa ka jingtalasi ïa ki kali kiba ñiah sted, ki trok kiba kit palat pud (Overloading), ki kali ba kit ki mar be-aiñ bad kiwei ki jingpynkheiñ aiñ kiba buh jingma ïa ki paidbah.
U la ban jur ba ka jingtalasi ïa ki kali na ka bynta ka jingshngaiñ jong ki paidbah ka long kaba donkam, hynrei ka dei ban long katkum ki aiñ, ki kyndon kiba la buh, ha kaba na ka liang u Officer-in-Charge ka Diengpasoh Police Checkpoint u la ai ka jingkular ban pynneh ïa ka jingïatreilang bad ki paidbah bad ba nangne shakhmat kum kine ki jingjia kin ym jia shuh.
Ka Dorbar Shnong Diengpasoh ka la pyntip ha u MLA ba kam shym la don ka jingpyntip lane ka jingïasyllok bad ka Dorbar shuwa ban buh ïa kine ki Checkpoint. Kumta ka la maham ba nangne shakhmat kino-kino kiba thmu ban buh ïa kum kine ki jaka, ki dei ban pyntip lane ïoh NOC na ka shnong bad ki bor kiba dei peit.
Ïa kine ki jaka talasi ba ki la pynïeng la dep pynpra bad weng noh, hynrei ka Shnong ka la ban jur ba kum kine ki jaka talasi kali ba shipor kim dei shuh ban mih khlem ka jingïasyllok bad ka jingïoh jingbit na ka Dorbar Shnong bad ki bor ba dei khmih.
U Bah Kharpran u la pynpaw ka jingai khublei ïa ka Khasi Students’ Union (KSU) kaba la pynlong ka jingpeitngor bad shimkhia ïa kane ka kam kaba la pyntip paidbah ïa kane ka kam, kumjuh ïa ka Dorbar Shnong bad ki paidbah ba kin don ka jingkitkhlieh.
U la pynpaw ruh ba un dang bteng ban buddien haba ïadei ka jingshngaiñ ki paidbah ha ki surokbah, kum ka jingpynher sted ïa ki kali, ki jingjia aksiden, ka jingkit palat pud ki trok (Overload) khamtam haba ïadei ka jingtreikam ka tnat pulit hapoh Mawryngkneng Constituency khnang ban pynthikna ïa ka jingtreikam ki pulit ba kan long katkum ka aiñ.
