Ba pynjlan sa 6 bnai ïa ka ilekshon, pyndam noh ka NPP ïa ka thup ki kyrtong

Shillong, Risaw 08

Kum ka jingpynbeit thymmai hashuwa jong ka ilekshon Garo Hills Autonomous District Council (GHADC) kaba la pynjlan biang sa hynriew bnai, ka National People’s Party (NPP) kala pyndam noh shuwa ïa ka thup ki 29 ngut ki kyrtong bala pynbna haba sdang une u snem.

U President ka NPP Meghalaya Bah Prestone Tynsong u la pynbna ban pynsangeh ïa ki artylli ki thup bala pynmih ha ka 16 tarik Rymphang bad 4 tarik Lber, haba shimkhia ïa ka jingtyrwa bala wanrah da u Working President ka party ba khmih ïa ka rilum Garo Marcuise N Marak.

Ha ka hukum, u Bah Prestone u la ong, “Ka jingpynbna kan sangeh treikam noh mardor. Kane ka long kaba donkam namar ka jingpynbeit thymmai ïa ki 29 tylli ki Constituency ka GHADC”.

Kane ka sienjam ka dei kaba la mih ruh na ka jingïalang ki heh Nongïalam ba long ha u Nailar hapoh ka ïingsah u Myntri Rangbah Conrad K Sangma.

Katkum ka shithi u Marcuise ba 6 tarik Risaw, ïa ka jingïalang la pynïaid da u Myntri Rangbah dalade ha ka jingïadonlang u Lamphang ka ïingdorbar Thomas A Sangma bad kiwei ki nongïalam ba la rangbah jong ka party.

“La shim ïa ka rai, namar ka jingdon ka jingpynbeit thymmai ïa ki Constituency ka GHADC, ka kyrteng jong ki kyrtong ba la jied hashuwa bad pynbna da ka party yn pyndam noh bad ïa ki kyrteng ba thymmai yn sa shong pyrkhat katkum ki Constituency ba thymmai,” ong u Marcuise ha ka shithi ba tyrwa ban pyndam noh ïa ka jingpynbna.

Ka thup ba hashuwa ka kynthup ïa baroh 29 Constituency. Ka party kala pynbna 24 tylli ki kyrteng ha ka thup ba nyngkong bad san tylli ha ka thup kaba ar.

Da ka jingpynbeit thymmai ïa u pud u sam jong ki Constituency ka Council, ki nongïalam kila rai ban sdang thymmai biang ïa ka kam ban jied kyrtong.

U Marcuise u la kular ba ïa ki kyrteng ba thymmai yn sa aiti sha u President ka Jylla ban ïoh jingmynjur shen.