Shillong, Risaw 08
U Nongïalam ka Liang Pyrshah u Mukul Sangma u la kynnoh ba ka Sorkar ka dei ka ‘Selective Priorities’ halor ka jingkhlad noh jong i khyllung ha shiteng lynti ha West Khasi Hills, namar ka jingbym don surok.
U Mukul u la ong ba ka kyndon jong ka PMGSY ha kaba sdang ka long 500 ngut na ka bynta ban ïoh ïa ka jingïarap bad ka Sorkar ka la pynhiar sha ka 250 ngut, hynrei bun ki shnong kiba ïoh ïa ka jingïarap ki dangsah khlem ka jingpynïasoh.
“Ha Gambegre ka don ka shnong kaba don 2 tylli ki longïing. Bun ki don 10, 15, 20, 30 tylli ki longïing. Ka jinglah ban wan jngohkai pyrthei. Ngi la pynbna ïa ki kum ki jaka jngohkai pyrthei bad ngi la pynïasoh ïa ki. Ha East Garo Hills, ngi la ai jingbit ïa ki 4 tylli ki shnong kiba don 17 tylli ki longïing,” u la ong halor kata ka nongrim.
“Ka jingïoh ïa ka koit ka khiah, ka ïew kaba jan tam bad ka jaka pule, lada la buh hakhmat eh ïa kane ka mat, yn jin da la shimkhia bha,” u la ong biang halor ka jingjia khlad noh i khyllung.
“Ha ka por jong nga, kam shym la don kano-kano ka jingpynthut, ngi la leit da ka nongrim ban pynbiang ïa ki jingduna. Hadien ba nga la kut noh, ka Sorkar mynta kam shym la pynbiang,” u la kynnoh.
Halor ka Meghalaya Integrated Transport Project kaba la kot sha ka 1000 klur tyngka, u Dr. Mukul u la ong ba ka MITP ka kynthup ïa ki surok kali bad ki jingkieng ïaid kjat sha ki ïew ki hat, ki jaka ai jingsumar bad ki skul, hynrei la kyntait ïa kane.
U la kynnoh ba ka Sorkar ka leh ‘quid pro quo’ ha ki skhim ruh kumjuh.
“Ki ïai kylla skhim kumba leh ka BJP ïa ki MLA ka UDP – phi wan, ngin ai ïa phi ïa kane. Haba ki pynbor ïa u M Dango ban iehnoh kam da kaba ong ba ngin ai ïa ka Simsang Sub Division, hato kata kam dei kaba be-aiñ? Ha ka por jong nga, ngi la thaw ïa ka Mawsynram Civil Sub Division, watla u MLA u dei na ka HSPDP, ym na ka Congress. Ka kam jong ngi ka long ban trei hok” la ong biang u Dr. Mukul.
Halor ka jingbha, u la ong ba ki surok kim ju neh bad ki jinglut ki kiew, kaba wanrah jingduhnong ïa ka pla tyngka. Kumta donkam ka jingpeit bniah.
“Dei na kata ka daw ba nga la wanrah ïa ka rai na ka bynta ka jingpeit bniah, hynrei ngam shym la lah ban ïaid shakhmat, namar ba ki sngi ki duna. Wat u CAG ruh u la peit bniah ïa kane bad ki briew ki pynpaw pyrthei ïa kane ha ki lad pathai khubor,” u la bynrap biang.
