Shillong, Risaw 08
U Myntri ka tnad pule puthi u Bah Lahkmen Rymbui u la ong ba ka jingnang jingstad kam dei tang ka lad ban pynïoh kam Sorkar hynrei ka dei ka atiar ban ïakhun ïa ki jingeh kiba wan ha ka jingim ban long ki briew kiba lah ban ïeng ha la ki jong ki kjat bad ban shaniah ïalade.
Haba ai jingkren ha ka jingrakhe Centenary Celebration jong ka St. Joseph’s Secondary School, Laitkor, East Khasi Hills, u Bah Rymbui u la ban jur halor ka jingdonkam ban ithuh bad pynheh pynsan ïa ka sap kaba uwei pa uwei u don ha ryngkat ka pule puthi kaba biang.
U la ong ba ka Sorkar Meghalaya ka la shim katto katne ki sienjam ban ai lad ïa ki samla ban pynkiew ïa ki sap ki phong ba ki don bad u la kyntu ïa ki samla pule ba kin wad ïa la ki sap ki phong jong ki, da kaba bynrap ruh ba ym don kano-kano ka kam kaba poh ne kaba kham halor.
U Bah Rymbui u la kyntu ruh ïa ki nonghikai ba kin ïai pynjanai bad pyntbit ïalade na ka por sha ka por ha kaba ïadei bad ka jingkylla ka pyrthei bad ka jingkiew ha ka juk stad saïan.
Ka St. Joseph’s Secondary School, Laitkor ka la rakhe ïa ka jingdap shispah snem (1926-2026) jong ka da kaba pynlong ïa ka jingpynkup burom bad ai khublei ïa ki nonghikai jong ka, kumjuh ki nonghikai barim bad ki khynnah skul barim.
Ïa kane ka jingpynkup burom u Bah Rymbui u la long kum u Kongsan, ha ka jingïadonlang u MLA ka BJP na Pynthorumkhrah u Bah A.L Hek, u Fr. Francis Kharpran, ki nonghikai, ki nonghikai barim, ki kmie ki kpa bad ki khynnah skul.
Ha kane ka jingrakhe la pyni ïa ki jingrwai jingshad jong ki khynnah skul bad ki jingïathuh haba ïadei ki jingïaid lynti jong ka skul ha kine ki shispah snem kumjuh u synñiang ba kane ka jaka pule ka la ai sha ka pule puthi.
U Bah A.L Hek haba kren kum u Symbud Kongsan, u la ïaroh ïa ki nongseng jong kane ka jaka pule kiba la wanrah ïa ka jingshai jong ka pule puthi ha Laitkor, ha kajuh ka por u la pynshlur ïa ki samla pule ban long kiba trei shitom, kiba ïaishah ïa ki jingeh bad ki ban sngewthuh ïa la ka jong ka bor bad ka jinglah lade.
Ka jingrakhe dap shispah snem ka pynpaw ïa ka sienjam ba kongsan ha ka histori jong ka St. Joseph’s Secondary School, da kaba kynmaw burom ïa ki kam ba la dep ha ryngkat ka jingai mynsiem ïa ka juk ba mynta ban rah shakhmat ïa ka nam ka burom ha ka pule puthi bad ha ki kam ki jam.
