Shillong, Risaw 08
U Symbud Myntri Rangbah ka Jylla u Bah Sniawbhalang Dhar u la ong ba ka Sorkar Jylla kam pat kyrkieh ban beh ïa ki nongdie madan hynrei kan hap wad ïa ki jaka die jingdie kiba biang ha kaba ki lah ban leh ïa ki kam khaïi kiba bha.
“Ngim shym la duh mynsiem, ngi trei na ka bynta ki paidbah, ngan nym ïathuh ïa phi ïa kaei kaba ngin leh, hynrei ngin leh ïa kaba donkam,” la ong u Bah Sniawbhalang haba kren bad ki nongthoh khubor.
U la ong ba ka kam pynkynriah jaka ha Khyndailad bad Laitum-khrah ka la dep, hynrei kano-kano ka kam kaba kham bniah yn sa leh tang hadien ba la lap ïa ki jaka sah kiba biang na ka bynta ki nongdie madan.
“Ki dei ki khun shynrang bad kynthei jong ngi hi, ngim lah ban beh noh ïa ki,” u la ong.
Haba pynshisha ïa ka jingpynslem, u la ong, “Ka daw jong ka jingpynslem ka long namar ba ngi hap ban buh ïa ki ha ka jaka kaba dei, ki dei ki briew jong ngi hi, ngim lah ban shu bret ïa ki.”
U Bah Dhar u la ong ba ka Sorkar ka thmu ban leh biang ïa kajuh ka rukom ba la leh ha Khyndailad bad Laitumkhrah ha kiwei pat ki jaka kum ha GS Road.
“Ki don shibun ki jaka, ngim pat pynkut, namar ngi hap ban peit la kan long ka kam kaba bha ne em,” u la bynrap.
Halor ka ïew Polo kaba la pynslem bha, u Bah Sniawbhalang u la ong ba ka jingai bynta la dep leh lut.
“Ngi la dep ai, tangba nga klet mano kita hynrei ngi la leh ïa kaba dei. Ngi la pynkut bad la buh dor T.50 shi sq ft. Ka dei ka dor kaba bha. Kumba ka long mynta ka jingïateh soskular la dep ïasoi, nga hap ban ai jingmynjur ïa ki kot ki sla katkum ki jingdonkam,” la ong u Bah Sniawbhalang.
