Nongpoh, Risaw 08
Ki pulit ka thanad Mairang hadien ka jingïoh jingujor halor ka jingkhlad kyndit jong kawei ka longkmie na Ri Bhoi ha ka shnong Maroid kaba hap ha ka thaiñ Mairang jong ka Eastern West Khasi Hills, ki la ïoh ban kem noh ïa u lok jong ka, u Kursur L Mawlong, 31 snem ka rta halor ka jingsuba donkti ban pynïap ïa ka mynha ka step phyrngap jong ka sngi Ba-ar.
Katkum ka khubor ba la pyllait da ki pulit ka Mairang, la ïathuh ba mynha ka 3 tarik mynta u bnai, katei ka longkmie kaba la tip kyrteng kum ka Kong Sperly Syngkli na ka shnong Umkaduh ha Ri Bhoi District, kala leit ban bud ïa la u lok sha ka shnong Maroid, hynrei ha ka step jong ka sngi Ba-ar, kata ka 6 tarik mynta u bnai, la lap ba kala khlad noh bad ki bahaïing hasem jong ka ha katei hi ka janmiet kila leit ban shimti ïa ka met kaba sah bad wanrah sha ka shnong ka jong ka sha Umkaduh na ka bynta ban pyndep ïa ka jinglehniam khatduh.
Namar ka jingsuba sniew halor ka jingkhlad kyndit katei ka longkmie, ki bahaïing hasem, ki la pyntip noh sha ki pulit ka thanad Nongpoh bad la rah ïa ka met sha Nongpoh Civil Hospital na ka bynta ban leh ïa ka post mortem bad kumba long mynta, ki bor pulit ki dang ap khmih ban ïoh ïa ka kaiphod jong ka port mortem.
La ïathuh ruh ba na ka liang ki pulit ka thanad Mairang, ki dang pynlong ïa ka jingtohkit kaba bniah halor kane ka jingjia bad leit ruh ban lum bad shimti ïa ki sakhi satar na ka shnong Maroid ha ryngkat ka jingdonlang ka kynhun na ka Crime Scene Unit bad pyntip ruh ba ki la kem noh ïa utei u lok katei ka longkmie, u Kursur L Mawlong ban pynlong ïa ka jingtohkit.
Shuh shuh, ki pulit kila pyntip ba ka jingtohkit halor kane ka jingjia ka dang ïaid shakhmat bad ïa ki sienjam ki ban wan yn sa shim katkum ki kyndon jong ka aiñ.
