Mawkyrwat, Risaw 08
Ka Khasi Students’ Union (KSU) Umdohlun Circle bad Warsanlyngdoh Circle hadien ka jingïoh jingujor na ki paidbah ha ka 7 tarik u Risaw 2026 ki la hiar jurip ïa ka Primary Health Centre (PHC) ha Wahkaji, South West Khasi Hills District.
Ha kane ka jingjurip ka seng ka la ïoh ban ïakren markhmat bad ki doktor ha kaba ki la pynsngew ïa shibun ki jingduna ha kaba ïadei bad ki jingdonkam hapoh kane ka jaka sumar bad na ka liang ki doktor ki la ïathuh ba ki jingduna kiba donkam eh ki long naduh ki nongtrei, Pharmacist, Lab Assistant, ka jingbym pat ker kynroh, ka jaka pynjhieh paidbah, ka bording ilektrik, Conference Room, Ayush OPD Room, Store Room, ka Quarter jong ki staff bad ka X-ray.
Haba ïadei bad kine ki jingduna, na ka liang ka seng ka la kyrpad ïa ka Sorkar lane ïa u Myntri ba dei khmih ba dei ban shimkhia ban pynbiang mardor katkum ka jingdonkam hapoh kane ka PHC.
Ha kajuh ka por ka seng ka la kyntu ruh ïa u MLA ka thaiñ Bah Pius Marwein ban shimkhia lem haba ïadei bad kane namar ki paidbah jong ka dong ka thaiñ Warsanlyngdoh bad Phlangdiloin ki ïakynduh jingeh manla ka por lada ki pang ki shitom namar ka jingbym biang ha kane ka jaka sumar.
