Shillong, Risaw 08
U Myntri ka tnad pule puthi ka Jylla u Bah Lahkmen Rymbui u la ïathuh ba ka Jylla ka don lypa haduh 4 tylli ki Polytechnic lane ki jaka pule Engineering bad kin sa don sa lai tylli kiwei pat kiba yn sa plie.
Ïa kane u Myntri u la ong ha ka sngi Palei haba ai jingkren ha ka jingrakhe dap 60 snem (Diamond Jubilee) ka Shillong Polytechnic kaba don ha Mawlai Kyntonmassar, Shillong.
Na ka liang u Bah Lahkmen u la ong ba ha ki 60 tylli ki snem ba ka Shillong Polytechnic ka la ai ki jingshakri ka la sei palat ïa ka 10,000 ngut ki samla pule bad na kane ka shlem pule ki la mih ki samla pule kiba la kyrshan bad kyntiew ïa ki tnad Sorkar bapher-bapher ïa ka Sorkar Jylla bad ïa ka Ri baroh kawei.
“Na kawei ka jaka pule Engineering mynta ngi la lah ban don sha ki saw tylli ki jaka pule ha ka Jylla bad kin sa don sa lai tylli kiwei pat ki ban sa plie ha kine ki sngi ban dang wan” u la ong.
Shuh-shuh u la ong ba ka jingjop jong ki khynnah pule lyngba ka Shillong Polytechnic ka pynlong ïa ka Sorkar Jylla ban shaniah bad sngewthuh ba ki khun samla jong ka Jylla ki lah ban leh bha ha kane ka laiñ bad kaba pynshlur ïa ka Sorkar ban nang pynbha bad pynbun shuh shuh ïa kum kine ki shlem pule ba kan long ka jingmyntoi ïa ki khun samla bad ba ka Jylla kan nangkiew ha ka liang ka ïoh ka kot.
Ha kane ka sngi la ïadonlang u MLA ka Mawlai Constituency u Bah Brightstarwell Marbaniang, uba la kren haba ïadei ka jingkylla sted jong kane ka pyrthei ba mynta bad ka jingkiew sted ka teknoloji bad ba ki khun samla kiba la nang la stad kim dei eh tang ban shu khmih lynti ban ïoh kam Sorkar hynrei ban sngewthuh ban pynïar ïa ka rukom pyrkhat haba ïadei ki kam ki jam.
Ha kane ka sngi ba la pynhap pyrda ïa ka jingrakhe jubili katei ka shlem ai jinghikai nalor u Myntri Sorkar u Bah Lahkmen Rymbui, u MLA ka thaiñ u Bah Brightstarwell Marbaniang la donlang ruh u Principal ka Shillong Polytechnic u Bah M. Lyngdoh, ka Director of Higher and Technical Education (DHTE) ka Hazel D. B. Sangma (MCS) lem kiwei-kiwei.
