Shillong, Risaw 08
Ki pulit ka East Khasi Hills kila ïoh ban kem ïa arngut ki nongtuh arshaka kiba la phla ruh ba ïa ka arshaka ba ki tuh, kila dep ban khaïi sha Bangladesh.
Kine ki arngut ki kyrteng u Shabamutlang Syiemlieh ba 23 snem na Mawpun, Golflink bad u Cornelius Mukhim ba 20 snem na Mawlai Mawroh.
U Superintendent of Police (Traffic) ka East Khasi Hills, u ïathuh ba ki pulit ka Lumdiengjri kila ïoh pdiang ïa ka ejahar ha ka 4 tarik Risaw ba shah tuh kawei ka Royal Enfield Hunter 350 ba don ïa u registration number ML05-AF-7596 na ka thaiñ Riatsamthiah Block-II.
U ïathuh ba ha ka jingtohkit bad na ki sakhi ba la ïoh lum, ha ka 7 tarik Risaw, ki pulit kila ïoh kem ïa u Shabamutlang bad da ka jingphla jong u, la ïoh ban kem sa ïa u Cornelius uba ïalam ban leh ïa kane ka kam bymman.
U SP u ïathuh ba kine ki arngut kila phla ba ïa kane ka arshaka la dep ban khaïi sha Bangladesh. Ka jingtohkit mynta ka dang ïaid shakhmat ban lapdien ïoh dang don kiwei pat ki briew kiba donkti lang.
