Shillong, Risaw 08
Ka Hills Farmer’s Union (HFU) ka la ai por shi bnai ïa ka Sorkar ban jubab ïa ki jingdawa ki nongrep bad ka la byrngem ruh ban mih surok ban pynlong da ki jingïakhih ba tyngeh lada ka Sorkar kam pat pynurlong ïa ki jingdawa.
Ha ka sngi Palei ka HFU ka la phah da ka jingthoh sha u Myntri ka tnad ri jingri ka Sorkar Jylla u Bah Sanbor Shullai ban dawa ba ka Sorkar ka dei ban map ïa ka ram kaba dei na ka Piggery Mission, ka Sorkar ka dei ban siew bai lutksan ïa baroh ki nongri sniang kiba la shah ktah ha ka khlam African Swine Fever (ASF), ban wanrah mardor ïa ka jaka talasi ïa ki kali ba kit ïa ki mrad shoh doh ha ka Jylla (Check Point) bad ka jaka peit bniah (Quarantine Centre) katkum ka Revise SOP ba la pynmih ha ka 10 tarik Nailar 2023 bad ban pynkhlaiñ ïa ka jingdon ki nongtrei ha ka tnad Veterinary khnang ba ka tnad kan lah ban ai ka jingshakri ba bha ïa ki nongri jingri ha ka Jylla.
Nalor kine, ka la dawa ruh ba dei ban sospon ïa u OC ka Byrnihat Police Station halor ki kam lum pisa be-aiñ bad ban kem ïa u trai ka Pankaj Das car-Rental kaba dei ka Account ba pdiang pisa ha Direct Entry.
Haba kren sha ki nongthoh khubor u Bah Allfondbirth Kharsyntiew, General Secretary ka HFU u la ong ba ka mat ba kongsan ba ki la pynsngew ka long ba dei ban sangeh noh mardor ïa ka jingpynpoi ïa ki sniang ba na shabar namar haduh mynta ym don dawai ba lah ban ïada ïa ki sniang ka Jylla na ka jingpang ASF.
“Dei ban sangeh ka jingwanrah ki sniang ba nabar namar haduh mynta ym don dawai ba lah ban ïada ïa ki sniang bad shisien ba la ïoh ka jingpang ASF baroh ki sniang ki ïoh jingpang” u la ong. Ha kajuh ka por u la pynpaw ka jingsngewkhia namar ba ki sem sniang ki la thylli bad ki nongrep ki mad ïa ka jingeh ba khraw.
Katkum ka jingong u Bah Allfondbirth, u Myntri u la kular ba ka Sorkar kan bishar bniah bad shimkhia ïa ki mat jingdawa jong ki. “U Myntri u la kular ba ka tnad ka la don ka jingthmu ban buh ïa ka Check Point, hynrei ki dang phah ban bishar biang ïa ka SOP sha ka tnad aiñ (Law) bad ynda la ïoh ka jingpynbna na ka Sorkar kin sa lah ban sdang ïa ka Check Point.
Haba ïadei ka jingsiew bai lutksan, ka Sorkar ka donkam ban pynlong ïa ka jingwad jingtip kaba bniah haduh katno ki nongri sniang kiba la shah ktah ha ki District bapher-bapher bad hadien kane yn mang tyngka ban ai jingïarap ïa ki nongri sniang ba la shah ktah.
