Shillong, Risaw 08
U President ka NPP Meghalaya Bah Prestone Tynsong ha ka sngi Palei u la takrain tyngeh ïa ka jingkam jong u MLA ka BJP u Bah AL Hek ba ki don katto katne ki MLA ka NPP kiba kwah pynïasoh bad ka BJP, da kaba ban ba baroh 33 ngut ki MLA ka NPP ki long tylli kawei.
“Ngam ngeit ha ki jingkynthoh, nga ngeit ïa ki jingshisha. Sngewbha haba phi kylli jingkylli ïa nga, kylli ïa ki jingshisha, wat nym shaniah ha kine ki rynsan social media, namar ba kim dei satia ki jingshisha ba pura,” ong u Bah Prestone haba kren sha ki lad pathai khubor.
U la ong ba ka jingkren jong u Bah Hek ka dei ka jingpynsngew shimet ka jong u bad ka bym don jingkhia eiei.
“Kata ka dei ka jingpynsngew jong u Bah AL Hek hynrei ngam tharai ba u Bah Hek u dei u President jong ka NPP, nga dei ma nga u State President jong ka NPP. Nga tharai nga tip kham bha ma nga ban ïa kiwei-kiwei,” la ong u Bah Prestone.
“Ai ba ngan ong ïa phi kawei, ngi long tylli kawei, baroh 33 ngut ki MLA jong ka NPP ki long kawei. Kumba ka long mynta, ngam ïohi satia ïa kano-kano ka jingpait satia,” u la bynrap.
U Bah Prestone u la ong ba jin lada dei ba kane ka jingkam ka wan na u President ka BJP Meghalaya, u la ai ka jingkynthoh.
“Ngan nym kynthoh eiei halor kane ka jingkren kaba la ai da u Bah AL Hek. Lada dei ba u President ka BJP Meghalaya u ong eiei, hangta nga lah ban kynthoh hynrei u Bah Hek, u dei tang u MLA,” u la ong.
“Kumta, nga sngew ba phi dei ban leit kylli na u Bah Hek bad ruh ban leit pat ban pynshisha na u State President ka BJP,” la bynrap u Bah Prestone.
