Shillong, Risaw 08
Ka Sorkar Jylla kala trei borbah ban rat dyngkhong ïa u drok da ki ar tylli ki buit ban pynkut ïa ka jingpynpoi drok bad ai jingsumar ïa ki nongdih, ong u Symbud Myntri Rangbah ba khmih ïa ka tnad Kam Pohïing Bah Prestone Tynsong ha ka sngi Palei, haba pynksan ïa ka jingpynkynriah kam ïa u SP ka Anti Narcotic Task Force (ANTF).
Haba kubur ba ki jingjia kam bymman na u drok ki dang bteng, u Bah Prestone u la ong ba ka Sorkar kala wanrah ïa ki lynti treikam hadien ka jingpynsdang ïa ka mishon.
“Ki jingjia ki dang ïai jia khlem artatien hynrei ngi la buh ïa kawei ka ‘Mission’ bala khlieh da u Bah Francis Kharshiing, ngi la dep thaw ïa ka kynhun kaba khlaiñ bad ki tnad bapher-bapher kum ka tnad Social Welfare bad kiwei ki tnad bad mynta kila ïatrei ïa ka kam,” u la ong.
Haba kdew ïa ki jingeh, u la ong, “Haba ïakren halor u drok, ki don ar bynta kiei-kiei. Kawei ka long ban ithuh bad pynkut ïa ka jingwan pynpoi drok bad kaba ar ka long ban ïarap ai jingsumar ïa ki nongdih”.
“Ngi la phah ïa ki sha ki rehabilitation centre bad ai ka jingïasyllok bad khatduh ka shim bun ka por ïa ki wat ba kin koit,” u la bynrap.
U Bah Prestone u ïathuh ba ki pulit kila thaw ïa ka ANTF Unit ka ban peit ïa ki kam ba ïadei bad u drok.
U la ong ban tehlakam ïa kane ka jingeh ka donkam ïa ka jingïatreilang bad ki Jylla ba marjan bad ba shajngai namar ïa u drok la khaïi na shiliang u pud u sam.
“Ngi donkam ban don ka jingïasngewthuh jingmut bad ki Jylla ba marjan namar ka Meghalaya kan ym lah ban leh ne khang ïa ka jingpynïaid lynti ïa u drok na kawei ka Jylla sha kawei pat bad wat na shabar ka ri India ruh,” ong u Bah Prestone.
Haba khot ïa ka jingïatreilang ka imlang sahlang, u la ong, “Ngi donkam ruh ban ïashim bynta ha kane naduh ki kmie kpa, ki khynnah bad ka shnong ka thaw bad wat ka Sorkar, ngi donkam ban don ka jingïatreilang ba ïajan hapdeng jong ngi”.
U la kyntu ïa ki nongshong shnong ban long kiba husiar bad pyntip sha ki bahaïing hasem ne ki marjan marpa haba ki mih na ïing ha ka por mynmiet.
Haba ïada ïa ka jingpynkynriah ïa u SP ka ANTF, u Bah Prestone u la ong ba ïa kane la leh katkum ki lynti kiba dei bad kan ym ktah ïa ka jingkhynra pyrshah ïa u drok.
