Shillong, Risaw 08
U Symbud Myntri Rangbah ka Jylla uba dei ruh u National Vice President ka National Peoples’ Party u Bah Sniawbhalang Dhar mynta ka sngi Palei u la pynrem ïa ki jingkynnoh ba ki don bun ngut ki MLA ka NPP kynthup na Garo Hills ki thmu ban pynïasoh sha ka BJP.
Haba kynthoh jur ïa ka jingkynnoh jong u nongïalam ka BJP u Bah AL Hek, u Bah Dhar u la ong ba ka NPP ka dang ïatylli pura bad kum kine ki jingkynnoh kin kut tang ka jingshah rkhie beiñ jong ki paidbah.
“Kam don jingïapher namar baroh ki seng saiñpyrthei ki kwah ban pynkhlaiñ ïalade, ban shu kam ka long kaba suk hynrei ban tan ïa ki, ka long kaba eh,” la ong u Dhar.
U la ong biang, “Lada phi kam jubor, phin sa shah rkhie beiñ ha ki paidbah, kum ka nuksa, lada phi kam ïa ka tnga jong uwei, phin sngew kumno? Ngam kwah ban kren eiei shaphang kiwei pat ki seng.”
U Bah Dhar u la kyntait ba kam don kano-kano ka jingbym sngewhun hapoh ka NPP.
“Ka NPP ka dei ka seng kaba ïatylli bha. Kata ka jingkam jong u Bah Hek ba ki don katto katne ki MLA, ngam tip. Ngi kum ka NPP kaba don 33 ngut ki MLA, ngi ïatylli pura,” u la ong.
Kumban shu pynkynmaw, u Bah Hek u la kam dang shen ba katto katne ngut ki MLA jong ka NPP khamtam na Garo Hills ki don ka jingïadei bad ka BJP bad ki kwah eh ban ïasoh bad ka seng shwa ka ilekshon sha ka ïingdorbar thawaiñ jong u snem 2028.
