Nongstoiñ, Risaw 09
Da ki hajar ngut ki paidbah nongshong shnong na ki shnong kiba shah ktah na ka Jylla Assam bad Meghalaya khamtam na ka thaiñ Ukiam-Kyrshai, ha ka 8 tarik mynta u bnai ki la ïa mih paidbah ban dawa pynsangeh noh shi syndon ïa ka jingthmu ka Sorkar Assam bad Meghalaya ban tei ïa ka Purpose 55MW Kulsi River Multipurpose Hydropower Project ha Wah Khri (Kulsi River).
Ïa ka jingïalang paidbah la pynlong da ka Assam-Meghalaya Joint Protection Committee (AMJPC) ha madan Kyrshai Cultural and Sports Club, Kyrshai, bad pynïaid ïa ka jingïalang da u President ka AMJPC Bah Albert Nonglang bad ka jingthmu ka long ban pyrshah ïa ka Kulsi Dam Project ba la thmu ban shna.
Ka AMJPC ka kynthup ïa ki kynhun seng bapher bapher bad ki shnong ba shah ktah na baroh ar ki jylla, Assam bad Meghalaya, khamtam na ka thaiñ Ukiam-Kyrshai, kiba ïa pyrshah ïa kane ka projek.
Ki nongkren kiba pawkhmat ha kane ka jingïalang ki kynthup ïa u Bah Phrester Manik Syiemlieh, Syiem ka Hima Nongkhlaw, Bah Order Syiem, Syiem ka Hima Rambrai, Bah Phlowing Syiem Nongbah, Acting Syiem ka Hima Nongmynsaw, Bah Serbilin Lyngdoh u President ka FKJGP Ri Muliang, Debajit Rabha u President ka Youth Wing ka AMJPC.
Ki nongkren ki la pyrshah tyngeh ïa ka Kulsi Dam Project ba la thmu ban shna bad ki la ong ba kin ïai pyrshah beit ha baroh ki rukom bad kin ym shah ïa ka Sorkar ban ïaid shakhmat bad kane ka kam.
Shuh shuh ki la kyrpad ïa ka jingkyrshan bad ka jingïasnohkti lang na ki paidbah ka thaiñ ba shah ktah na baroh ki ar Jylla, Assam bad Meghalaya, kiba lah ban shah ktah na kane ka projek. Ki nongkren ki la ong lada ka Sorkar Assam ne Meghalaya ka pyrshang ban pynïaid shakhmat ïa ka jingpyntreikam ïa kane ka projek, kin sa pynlong ïa ki jingïakhih bad jingpyrshah kiba tyngeh. Ki la maham ruh ba kine ki sienjam ka Sorkar ki lah ban pynthut ïa ka shongsuk shongsaiñ ha ka thaiñ.
