Shillong, Risaw 09
U MP Rajya Sabha u James PK Sangma u la pynthikna ïa ki nongshet ja bad ki nongïarap ha ki skul kiba trei hapoh ka skhim PM-POSHAN ba un shimkhia bad rah ïa ki jingdawa jong ki ban pynkiew ïa ka jingsiew (Honorarium) ba ki dei ban ïoh na ka Sorkar Pdeng.
Kane ka jingkular jong u ka dei hadien ba ki nongïalam jong ka Union of Cook Cum-helper PM-POSHAN ki la phah da ka jingthoh bad ki la pynpaw ïa ki jingkynduh jingeh jong ki haba ïadei ka jingsiew ba ki dei ban ïoh.
“Ki la pynpaw ïa ki jingkynduh jingeh jong ki ha kaba ïadei bad ka bainong ba la siew bad kumno kam pat biang bad ba dei ban don ka jingpynkylla,” la ong u James Sangma.
U James u la ong ba u la pynthikna ïa ka kynhun ba ïa ki mat jingdawa jong ki, un shimkha ban ïakren bad ban rah ha ka kyrdan ba hakhlieh duh. “Kum u MP na Meghalaya, ngan rah ïa ki jingeh jong ki shaduh ka Sorkar India khnang ba ki jingeh jong ki, yn weng bad pynsngewthuh ïa ka Sorkar Pdeng ïa ki jingeh ba ki ïakynduh” u la ong.
“Ngan pynbor bad kyrpad jur ïa ka Sorkar India ban sngap ïa ki mat jingdawa ki nongshet ja skul, khnang ba yn lah ban ïapynbeit haba ïadei kane ka bynta,” u la bynrap.
