Shillong, Risaw 09
U nongïalam ka BJP uba dei ruh u MLA ka Pynthorumkhrah Konsti-twensi, u Bah A.L Hek u la ong ba kum u Nong-ïalam ba la slem ka party bad kumjuh ruh kiwei pat ki nongïalam jong ki party bapher-bapher kim pat ju’Kyn-me’ ne kam lok ïano-ïano.
Kane ka jingkren u Bah Hek, ka wan hadien ka jingkren u Symbud Myntri Rangbah ka Jylla u Bah Sniawbhalang Dhar uba dei ruh u National Vice President ka NPP, kaba u kren sha ki lad pathai khubor shaphang u Bah Hek da kaba ‘Kyn-me’ sha ki lad pathai khubor.
Halor ka jingkren jong u Bah Sniawbhalang, ba u ong, “Lada nga kam ïa ka lok jong me me sngew kumno” kaba u jubab ïa ka jingkren u Bah Hek ha ki khyndiat sngi ba la dep ba kin don ki katto-katne ki MLA kiba kwah pynïasoh bad ka BJP hashuwa ka ilekshon 2028, u Bah Hek u la ong ba u kwah ba ka jingkren jong ki Nongïalam ba mynta, kam dei ban ktah ïa ka lawei ki khun ki kti ne ki pateng ban sa wan.
“Kum ki nongïalam ka Jylla, kin ym lah ban pdiang ïa kum kita ki kyntien, kaba ai ki jinghikai ba bakla ïa ki samla bad ki pateng ban wan,” u la ong.
“Ki katto-katne ki MLA, ym tang na Rilum Garo hynrei na kylleng ki District ba ki katto katne ki party ki kwah ban pynïasoh bad ka BJP. Te nga ong ha ka jingkren jong nga bad nga kren da kaba shai ba ka jingkhang jong ka BJP ka plie baroh 24 kynta, lada don mano-mano ba kwah ban rung sha ka BJP,” la ong u Bah Hek.
U Bah Hek u la ong ruh “Ngin ym lah ban pdiang ïa kum kita ki kyntien kiba la kren da u Bah Sniawbhalang, kaba ngi ai ka jinghikai kaba bakla ïa ki khun samla ha ki pateng ban wan bad ïa ki khun ki kti ruh kumjuh”.
Katba halor ka jingkren jong u Symbud Myntri Rangbah Bah Prestone Tynsong, u Bah Hek u la ong, “Ngam pat peit ne pule ïa kata ka jingkynthoh jong u Bah Prestone, hynrei ka dei beit ka jingpynsngew jong u shimet. Ngam don ban ong eiei ïa kaei kaba nga khlem ïohsngew kaba la ai da u Bah Prestone Tynsong.”
