Shillong, Risaw 09
Ka ïingbishar Meghalaya High Court ha ka sngi Palei kala ñiew kum ka kam beaiñ ïa ka jingpep leit pyndep ïa ki kam kashari da ka Shillong Bar Association bad ka High Court Bar Association namar ka jingdawa weng ïa u Advocate General bad kala pynngat da ka mukotduma suo motu ‘criminal contempt’ pyrshah ïa ki nongkitkam jong kine ki Association. Ka Division Bench jong ka Chief Justice Revati Mohite Dere bad Justice HS Thangkhiew kila register ïa ka PIL No.21/2026 hadien ba shimkhia ïa ka rai jong kine ki Association ba 30 tarik Nailur, 2026, kaba khot ïa ka jingpep leit ïingbishar naduh ka 1 tarik Risaw ha baroh ki District tad haduh ba ka Sorkar kan weng ïa u Advocate General.
“U Registry u la wanrah hakhmat jong ngi ïa ki jingkhein na baroh ki District, kynthup ka High Court. Ka jingkhein ka pyni ba ka jingpep leit ïingbishar kala ktah ïa ka jingai ïa ka jingbishar ba hok. Ka jingpep ha High Court bad baroh ki District lait noh ka Baghmara kala pynlong ïa ki nongïakhun mukotduma ban nym don ki nongïasaid,” ong ka ïingbishar.
Ka ïingbishar kala ïaroh ïa ka Baghmara Bar Association namar ka jingkyntait ban ïasnohkti lang ha katei ka rai, haba pynpaw ba kan long kaba ïaid pyrshah ïa ka hukum ka Supreme Court ha ka mukotduma Ex. Capt Harish Uppal v.Union of India (2003) 2 SCC 45.
Haba pynmih ïa ka notice hapoh ka kyndon 15 jong ka Contempt Act pule lang bad ka Article 215, ka ïingbishar kala bthah ban show cause ïa 21 ngut ki nongkitkam jong ki Bar Association ba balei ym dei ban tian bishar criminal contempt ne ïaleh pyrshah ïa ka bor ka ïingbishar pyrshah ïa ki.
Ïa ka notice la phah sha u President ka High Court Bar Association K.S. Kynjing, Sr. Adv, Vice President N. Syngkon bad Pyllang Nongbri, Secretary General Kishore Ch. Gautam, Secretary Andrew R. Passah bad Arnold G. Momin, Treasurer Sujit Dey bad 8 ngut ki executive member kata Apu Dey, Andrew M. Sangma, Cherak C.T. Sangma, Jonathan M. Thangkhiew, H.L. Shangreiso Sr. Adv, Melvbin M. Laitmon, Raymond K. Majaw, Rosylia Kharshiing.
Na ka Shillong Bar Association, ïa ka notice la phah sha u President H.R. Nath, Vice President Nelson Kharnarbi, Secretary Teiborlang Jyrwa, Assistant Secretary N. Shyambor Singh Marpan bad Nurina N. Lyngdoh, Treasurer Ilawanda S. Lyngdoh bad ki executive member Kishore Ch. Gautam, Ricky Nelson Marbaniang, Jonathan M. Dkhar, Jyoti K. Marak, Krishna Sharma bad Stevie R. Lyngdoh.
La bthah ïa baroh 21 ngut ba kin wan mih dalade hakhmat ka ïingbishar ha ka sien shong bishar ban wan, kata ha ka 13 tarik Risaw, 2026.
Ka ïingbishar kala maham ba lada kim sdang treikam noh ha baroh ki District, kan sa ai lang ïa ki notice contempt pyrshah ïa ki President, Secretary bad ki nongkitkam jong ki District Bar Association, lait noh ka Baghmara. Kala pynlong mamla ruh ïa ka Bar Council of India kum ka liang mamla ba 5 bad phah notice sha ka State Bar Council of Meghalaya bad CBI, haba khmih lynti ba u Chairman ka State Bar Council un wan mih dalade ha ka sien shong bishar ban wan ba un pyntip ïa ki sienjam bala shim pyrshah ïa ki nongïasaid aiñ kiba ïakhih.
