Shillong, Risaw 11
Kum shi bynta jong ka jingtreikam ban dawa na ka Sorkar Jylla ban thaw noh ïa ka Comprehensive Employment Policy khnang ban pynkhlaiñ ïa ka lad kamai kajih jong ki khun samla ka Bri U Hynñiewtrep, ka Hynniewtrep Youth Development Council (HYDC) ha ka 10 tarik u Risaw ka la sdang ïa ka jingwad bniah lane ‘Labour & Employment Survey’ naduh Khanapara haduh Jorabad.
U president ka HYDC u Bah Raiwan Sohtun u la ong ba ka thong jong kane ka ‘Survey’ ka long ban lum ïa ki jingtip ba shisha halor ka jingthungkam bad ka rukom siew tulop ha ki jaka theh umphniang kali (Petrol Pump), ki Mall, ki Guest House bad kiwei-kiwei ki jaka trei ha ka thaiñ.
“Kane ka ‘Survey’ kan ai ïa ki sakhi bad ki jingtip kiba donkam ban pynsngewthuh ïa ka Sorkar halor ka jingeh kaba ki samla trai Jylla ki mad ha kaba ïadei bad ka jingïoh kam ïoh jam” u la ong.
Ha ka jingïaid jong kane ka ‘Survey’ na Khanapara haduh Jorabad, la lap ba ha bun ki jaka trei, ki briew kiba ïohkam ki dei kiba wan naduh ka Rajasthan, Assam bad kiwei kiwei ki Jylla bad lyngba kane ka jinglum jingtip la lap ba tang khyndiat ngut eh ki nongtrei Khasi lane ki trai ri trai muluk ki ïohkam.
Shuh-shuh u la ong ba ka jingsiew tulop ha katto katne na kine ki jaka trei ka paw ba kam ïahap bad ka dor jong ka Minimum Wage ïa kaba la buh da ka Sorkar Meghalaya. ” Kine ki jinglap ha ka jingsdang jongngi ka pyni ïa ka jingdonkam ban bishar bniah ïa ka rukom thungkam, ka jingsiew tulop bad ka jingailad ïa ki samla trai Jylla ban ïohkam ha la ka jong ka Jylla” u la ong.
U la pynpaw ba ka HYDC kan dang bteng ïa kane ka jingwad bniah ha baroh ki Distrik jong ka Khasi bad Jaintia Hills khnang ban ïoh ïa ki jingtip kiba bniah bad kiba kynthup lut shuwa ban pynmih ïa ka jingbishar kaba khatduh.
Ka HYDC ka dawa na ka Sorkar Jylla ban thaw noh ïa ka Comprehensive Employment Policy kaba kynthup ïa ki bynta bapher-bapher jong ki Private Sector kumba la kdew. Ka la dawa ruh ba kane ka polisi kan bhah haduh 80% ka jingaikam ïa ki khun samla ba na ka Jylla, ka polisi ka dei ruh ban don ka jingpeitngor kaba thikna khnang ba ki nongtrei kin ïoh ruh ïa ka jingsiew kaba shong hok katkum ka dor ba la buh da ka Sorkar.
Ka HYDC ka kren shai ba ka jingdawa kam dei ban khanglad ïa ki briew ba wan na kiwei ki Jylla, hynrei ka long ban pynthikna ba ki khun samla ka Bri U Hynñiewtrep kin ïoh ka lad kaba hok ha ka ïohkam ïoh jam ha la ka jong ka Jylla bad ba ki nongtrei kin ïoh ïa ka jingsiew kaba biang katkum ka aiñ.
Shuh-shuh ka HYDC ka la pynpaw ba ynda ka la pyndep ïa kane ka ‘Survey’ ha baroh ki Distrik Khasi bad Jaintia Hills, kan sha phah ïa ka kaiphod jingïohlum jongka sha u Myntri ba dei khmih jong ka tnad Labour ka sorkar Jylla ryngkat ka jingkyrmen ba ka Sorkam kan shimkhia ban thaw ïa ka Comprehensive Employment Policy ka ban long ka jingmyntoi ïa ka lawei ki samla ka Jylla.
