Shillong, Risaw 11
U Nongïalam ka Liang Pyrshah bad u Myntri Rangbah barim ka jylla u Mukul Sangma u la ong, ka lad ban ïoh ïa ka jingbishar kaba hok kala kylla long kaba remdor bha bad ka bym kot bor shuh na ka bynta ki riew paidbah bad u la ïawer ïa ki bor synshar ba ki dei ban wanrah ïa ki jingkylla kynthup ïa ki ïingbishar ne ka Judiciary.
“Ngi dei beit ban sngewthuh ba kiba shah ñiewbeiñ bunsien hi ki dei kiba tlot bad ki nongleh beiñ ki dei beit kiba khlain bor. Kumta ha kane ka rukom treikam kaba ngi don, ka bor jong ka jingai ïa ka jingbishar kaba hok ruh ka dei ban don ïa ka jingkylla,” la ong u Mukul.
U la ong, ka jingwanrah ïa ki jingkylla ïa ka jaka treikam dei ban kynthuplang ïa ki ïingbishar bad ka pynkynmaw ïa ki por ha ka jylla ba kala pynïakhlad ïa ka bor synshar bad ïa ki ïingbishar.
“Ka dei ban don, ngi kren shaphang ka jingwanrah ïa ki jingkylla ïa ki jaka treikam bad ka jingwanrah ïa ki jingkylla ïa ki jaka treikam ka kynthup ruh ïa ki ïingbishar. Dei na kane la phiah noh la ka jong, ïa ka bor synshar na ki ïingbishar bad ka Meghalaya ka dei kawei napdeng ki jylla kaba sted tam ban pyndep ïa kane ka bynta baroh kawei jong ka jingphiah ïa ka bor jong ka kam synshar bad ki ïingbishar. Balei? Namar ba ngi angnud ba ngin leh ïa kaei kaba ngi ïalap bad ngi la pyni ruh ïa kane da ka kam,” u la ong.
U Mukul u la ong, ba wat hapdeng jong ka jingwanrah ïa ki jingkylla, hynrei ka jingai ïa ka jingbishar kaba hok kam shim la lah pat ban poi sha kiba bun.
“Kumta ka jingwanrah ïa ki jingkylla ïa ki jaka treikam kiba la dep leh, mynta da ka jingïaid baroh jong ka rukom treikam, kala paw shai ba ka lad ban ïoh ïa ka bishar kala long kaba la remdor bad kylla ruh kum ka bym lah ban kot bor shuh. Kumta ki jingwanrah ïa ki jingkylla kiba heh ki long kiba donkam bha,” u la ong.
U la ïawer ruh ïa ka jingdonkam ban don ïa ka jingïatai kaba ïar ha kylleng ki jylla bad ha ka ri.
“Ïa kane hap ban ïakren bad ïatai ha kylleng ki jylla bad ha kylleng ka ri bad ngi dei ban pynmih eiei na ka, ka ban lah ban pynlong ban ïoh ïa ka lad sha ka ïingbishar kaba hok na ka bynta ki riew paidbah,” la bynrap u Mukul.
