Shillong, Risaw 11
Ka North Eastern Electric Power Corporation Limited (NEEPCO) ha ka Sngi Thohdieng ka la ong ba ka la ïoh pdiang ïa ka jingïohnong kaba heh tam ha ka ‘Profit After Tax’ (PAT) kaba T. 769.08 klur ha u snem 2025-26 bad ka long haduh shi bynta na ka lai ha ka jinglah ban pynmih bording ba la buh jong ka Thaiñ Shatei Lam Mihngi baroh kawei.
Ka ‘Corporation’ ka la ïasam ïa ka jingtreikam jong ka ha ka jingïalang ba man u bnai jong ka Inter-Media Publicity Coordination Committee (IMPCC) na ka bynta u bnai Risaw, 2026 kaba la long ha NEEPCO, Shillong.
Haba pdiang sngewbha ïa ki nongïashim bynta, u Samiran Sinha Ray, Chief Human Resources Officer (CHRO), NEEPCO, u la batai lyngkot halor ka jingtreikam jong ka ‘Corporation’ baroh kawei, ki jingjop kiba khraw bad ki jingthmu kiba dang ïaid shakhmat. Ka jingbatai bniah lyngba ka ‘Presentation’ ka la pynpaw ïa ka jinglah ba la buh jong ka, ka jingtreikam ha ka liang ka pisa-tyngka, ki mawjam ba kongsan ha ka jingtreikam, ki projek ki ban dang wan bad ka jingnoh synñiang sha ka thaiñ.
Katkum ka jingbatai, ka NEEPCO ka don ïa ka bor ba la buh kaba 2,051 MW ha ka Thaiñ Shatei Lam Mihngi, kaba kynthup ïa ka ‘Hydro Power’ kaba 1,519 MW, 527 MW kaba pyndonkam da ka ‘Gas’ bad 5 MW na ka sngi. Katkum ka jingtip na ka National Power Portal, kane ka long kumba 32.6% na ka jinglah kaba la buh jong ka thaiñ kaba long 6,298 MW.
Ha kane ka jingbatai la kdew ïa ki ‘Station’ ba kongsan kynthup ïa ka Kameng Hydroelectric Power Station (600 MW) ha Arunachal Pradesh, kaba la pyntreikam ha u snem 2020-21.
Ka NEEPCO ka la ong ba ka dang buddien ïa katto-katne ki projek kiba heh kynthup ïa ka ‘Heo’ kaba 240 MW, ‘Tato-I’ kaba 186 MW bad ‘Tato-II’ kaba 700 MW ha Arunachal Pradesh. Haba phai sha ka bording kaba lah ban pynthymmai, ka dang buddien ruh ïa ka projek ‘Solar Photovoltaic’ (ba la buh hapoh khyndew) kaba 300 MW ha Bikaner, Rajasthan.
Ïa kine ki jingthmu la khmih lynti ba kin pynbun ïa ka jinglah bad ban kyrshan ïa ka jingkylla ha ka bording kaba khuid jong ka India, la ong ka ‘Corporation’.
Ha kajuh ka por, la pynpaw ruh ïa ka CSR jong ka bad ki jingthmu pynroi ïa ka imlang-sahlang kiba pynleit jingmut ha ka pule-puthi, ka koit ka khiah, ka khuid ka suba, ka jingpynroi ïa ki sap ki phong bad ka jingkyrshan ïa ki bynta kiba duna ha ka ïoh ka kot.
Kum shi bynta jong ka ‘Swachhata Hi Seva’, ka NEEPCO ka la shim ïa ka MUDA Shopping Complex kaba ha Khyndailad, Police Bazar, Shillong, kum ka Cleanliness Target Unit (CTU) bad ka dang shimkhia ïa ka jingpynkhuid ba man ka por, ka jingpynkhuid ïa ki umbiah-kwai bad jingtah shun bad ka jingbret jaboh pathar ban kyntiew ïa ka khuid ka suba.
Ka IMPCC, kaba la thaw da ka tnad Ministry of Information and Broadcasting ha ka kyrdan jong ka thaiñ, ban pynsuk ïa ka jingïakren bad ka jingsam jingtip hapdeng ki tnad Sorkar, ki PSU bad ki tnad pathai khubor.
Ha kane ka jingïalang la wan ban ïashim bynta da ki nongmihkhmat na NEEPCO, NEHU, Soil & Water Conservation, Power Grid, Census, Akashvani Programme Section, ICAR Umiam, Doordarshan Kendra Meghalaya, IMD Shillong, NEIAH, NECTAR, PIB bad CBC.
