Shillong, Risaw 12
Ka Sorkar Jylla lyngba ka tnad Transport ka la shim ïa ka rai ban tei ïa ka jaka pynïeng kali ha Umtyngar na ka bynta ki kali Tourist ba kit ïa ki nongwan jngohkai pyrthei ha Rilum Khasi bad ban thaw ruh da ka Committee ba kyrpang ban peit ne bishar bniah ïa ki mat jingdawa ki nongñiah kali kamai ba na ka Jylla.
Ïa kane ka rai la shim ha ka jingïalang ba la khot pynlong da ka tnad Transport ha kaba la pynïaid ïa ka jingïalang da u Symbud Myntri Rangbah ka Jylla u Bah Sniawbhalang Dhar ha ka jingïashim bynta lang u Deputy Commissioner u Abhilash Baranwal, IAS, u Superintendent of Police (SP) u Bah Vivek Syiem, IPS, ki ophisar na ka tnad Tourism bad tnad Transport, ki nongïalam jong ka All Khasi Meghalaya Tourist Taxi Association (AKMTTA), katto katne ki trai Homestay, Hotel bad kiwei-kiwei.
Haba kren sha ki nongthoh khubor u Bah Sniawbha u la ong ba ka rai kaba mih na kane ka jingïalang ka long kaba sngewtynnad bad kaba seisoh namar ba la ïakren ïa ki jingeh jong ki nongñiah kali kamai ka Jylla kaba ki la dawa ïa ka Sorkar Jylla la katto katne snem.
U la ong ruh ba ka Sorkar ka la ïohpdiang ruh ïa ki jingkyrpad jong ki nongñiah kali Tourist ba na ka Jylla bad kumta ki la shim ïa kawei ka rai ban buh ïa ka jaka pynïeng kali ha ka thaiñ Umtyngar lem bad ka Food Court, ki paiñkhana bad kiwei-kiwei de ki jingdonkam. “Kane ka jaka kan long kum ka jaka ban pynhïar ne pynkiew ïa ki nongwan jngohkai pyrthei bad ngi la mynjur ïa kane” u la ong. U Bah Sniawbha u la ong ba lyngba kane ka jingshim rai jong ka Sorkar bad kiba don bynta ha ka kam jngohkai pyrthei la kyrmen ba yn nang lah ban nang khring shuh-shuh ïa ki nongwan jngohkai pyrthei hapoh ki lum ba pyngngad bad ki kshaid kiba itynnad jong ka Rilum Khasi bad Jaiñtia bad ka Jylla baroh kawei.
U la kyntu ïa ki trai Hotel, ki Homestay ban ïakren ban ïa pynbeit bad ki nongñiah kali kamai ba na ka Jylla ba kan long kum ka jingkyrshan ïa ka kam jong ki. “Kane ka Committee ba ka thaw hapdeng ki nongñiah kali bad ki trei jong ki Hotel, Homestay bad ki Tour Guide, kan sa shong jingïalang ban ïa pynbeit ha kata ka rukom ba ki nongwan jngohkai pyrthei haba ki donkam kin hap ban pyndonkam shwa ïa ki kali kiba na ka Jylla,” la ong u Bah Sniawbha.
Haba jubab ïa ki jingkylli kaba ïadei halor ka jingshngaiñ ki nongwan jngohkai pyrthei, u Bah Sniawbha u la jubab ba ki pulit kin pynlong ka jingpeitngor ba 24 kynta ha ka shi sngi bad hynñiew sngi ha ka shi taïew (24×7) ha shi lynter ka surok sha Sohra, kumjuh ruh yn pyndait ki kor CCTV ha ki jaka ba donkam ba kynthup ha ki Hotel, Homestay bad kiwei de.
