Shillong, Risaw 12
U Symbud Myntri Rangbah ka Jylla Bah Sniawbhalang Dhar u la ong ba ka jingïakhih jong ka Cockroach Janta Party (CJP) kan nym ktah ïa ki samla ka Jylla Meghalaya bad ong ruh ba ka dei ka mat jong ka Sorkar Pdeng ban pynpeit ïa ki jingdawa jong ka.
“Ym leilei, namar kane ka dei ka mat jong ka Sorkar Pdeng. Nga tharai ka Sorkar Pdeng kan pynbeit bha ïa kane” la ong u Bah Dhar haba kylli ïa ka jingktah kaba lah ban mih na katei ka jingïakhih ki nongïalam bad ki nongkyrshan jong ka CJP.
Haba jubab haba ïadei ka jingdawa ka CJP ban weng noh ïa u Chief Election Commissioner, u Bah Dhar u la kyntait ban kren ne kynthoh eiei da kaba ban ba ka dei ka mat jong ka Sorkar Pdeng ban pynbeit ïa katei ka jingdawa.
U la ong ba katei ka jingdawa, ka Sorkar India hi ka dei kaba biang tam ban jubab bad pynpaw ba um sngewdon hok ban jubab eiei ïa ka bynta ba dei jong ka Sorkar Pdeng.
Haba kylli hato ki nongthep Vote ba dang samla ka Jylla kin shah khring ban rung sha ka CJP, u Bah Dhar u la ong ba ka Sorkar ka ïengskhem ka ju don ryngkat bad ki samla, kumta u la pynpaw ïa ka jingshaniah ha ki. “Ngam tieng ïa ki samla ka Jylla. Nga ju ïeid bad burom ïa ki samla ka Meghalaya, namar ki samla ka Jylla jong ngi ki long kiba stad bad kiba tip ïa kaei kaba ki dei ban leh hadien habud, namar kum ka Sorkar ngi don ryngkat bad ki” u la bynrap.
