Kloi ka Sorkar ban pynpra ïa ka khyrdop lum pisa beaiñ, dei ban pynpra noh ïa ka mandir ha CBI : KSU

Shillong, Risaw 12

Ka Khasi Students’ Union (KSU) Shillong Mihngi Circle ha ka 12 tarik u Risaw, 2026, ka la leit ban ïakynduh ïa u Director ka Urban Affairs, u PK Boro, ban ïakren halor ka jingbym leh eiei ïa ka mandir ba la shna ha phyllaw ka ophis Central Bureau of Investigation (CBI).

Haba kren sha ki lad pathai khubor u Samla Celestine Ronghang, Assistant General Secretary, u la kdew ba haba ka Sorkar ka la hukum ban leit pynpra ïa ka khyrdop ba lum pisa beaiñ ki pulit, kidei ruh ban phah pynpra ïa ka mandir ha phyllaw ka CBI, Mawdiangdiang.

“Ka CBI kaba don ha Mawdiangdiang, ka dang dei tang ka nongshong wai namar ba ka jaka kadei jong ka Sorkar Jylla. Kam lah ban leh trai hi bad ban shna katba mon ïa kaei kaba ma ka ka kwah,” u la ong.

“Shisien pyrkhat ka seng ka sngewkmen ba la don katei ka ophis treikam, ka ban rat dyngkhong ïa ka bam sap, hynrei ban sdang tuh pat ïa ka jaka kaba rit na ka Sorkar Jylla, kamut dei ma ka hi kaba sdang ban bamsap,” la ong u Samla Celestine .

U la pynpaw ruh ka jingsngew lyngngoh ba ki pulit kiba don ha katei ka jaka kim shym la ïohi ïa ka jingtei beaiñ ïa katei ka mandir, haba ki don hajan. Ki pulit kim dei bam shah ïalam bakla, khnang ban wanrah ïa ka jingshngaiñ ha ka shnong ka thaw bad ha ka imlang ka sahlang.

Namarkata, u Samla Celestine u la bynrap biang ba ka mandir ba la shna beaiñ ha phyllaw ka ophis CBI, ki pulit kidei ban leit pynpra mardor, bad kata ka jingkwah jong ka seng.

“Weng ïa ka mandir na katei ka jaka. Bad lehse ka jingbym lah ban weng ïa katei ka mandir, lah ban don ka jingïohnong da mano re mano na sha lyndet. Kumta kim nud ban weng ïa katei ka mandir,” la bynrap u Samla Celestine.

Ha ka jingïakynduh bad u Director ka jingïakren shibynta kam pat hun hynrei lada ka jingdawa kam urlong, ka KSU kan sa shim da kiwei pat ki sienjam.