Shillong, Risaw 12
Ka Khun Hynñiewtrep National Awakening Movement (KHNAM) ha ka 12 tarik u Risaw, 2026, ka la leit ban ïakynduh ïa u Secretary ka Meghalaya Urban Development Authority (MUDA), ban kylli bniah halor ka RTI ba ki la ïoh halor ka jingai wai ïa ki paiñkhana paidbah, kiba hap hapoh ka jingpeit ka MUDA.
U Bah Thomas Passah Working President ka KHNAM, haba kren sha ki lad pathai khubor u la ong, ba la khot tender ban ai wai ïa kitei ki paiñkhana paidbah naduh u bnai Naiwieng mynshem snem, hynrei haduh mynta kata ka jingkhot tender ka la shu kut noh.
“Lyngba ka RTI, ka seng ka lap ba ka tnad ka la pynïaid hi dalade,” u la ong.
U Bah Thomas u la ong ba ka seng ka pyrshah ba ïoh ka don ka jingai tender ïa ki briew ba ki mon.
U la ïathuh ka dor ba la buh ha ki paiñkhana paidbah kadei 5 tyngka bad 10 tyngka, hynrei ki don kiba shim haduh 10 bad 15 tyngka, kaba long palat ïa ka dor ba la buh da ka MUDA.
“Haba ka MUDA hi kaba buh ba dei ban shim 5 tyngka, kumno pat la shim haduh 10 bad 15 tyngka ka bai paiñkhana. Lada ka tam tang 5 tyngka ruh, kadei beit ka jingbam sap,” la ong u Bah Thomas.
Haba ïadei bad ki jaka pynïeng kali ka seng ka la kyntu ba ka MUDA, kadei ban khot da ka tender namar haduh mynta ka MUDA ka dang pynïaid hi.
