Shillong, Risaw 12
Ha kano-kano ka longïing haba ban ka jingduk bad duna ha ka ïoh ka kot, ki mad beit ïa ka jingjynjar, khamtam haba don ka jingshitom hapoh ïing poh sem.
Ïa kane, ngi lah ban sakhi ïa kawei ka longïing kaba don ha ka shnong Domkyrkoh, West Khasi Hills, kaba hap ha Rambrai Konstitwensi, kaba la mad ïa ka jingeh haduh katta-katta, namar u Kpa ka ïing u la shu thiah pang ha jingthiah la kumba 6 bnai mynta.
Kane ka longïing ka don 10 ngut ki khun.
U ne u rangbah u dei uba la tip kyrteng u Bah Jeningstar Lyngkhoi, ba la don 42 snem ka rta.
Haba ïakren bad ka lok jong u Bah Jeningstar, kata ka Kong Dimo Nongsiej ka la ïathuh, ba ka jingshitom kadei hadien ba u Bah Jeningstar u la hap najrong ka trok, katba u dangthad rnga bad leit dei ha u nar ba pynieng ha madan.
Ka la ïathuh ruh, ba u nar u la kum leit dei na ki bynta ba shadien jong ka met u Bah Jeningstar bad la ksam ruh haduh ki snier jong u, kaba la jur ka jingshitom.
Hadien kane ka jingjia ki la leit ban phah sumar ha Civil Hospital, Shillong hynrei mynta kane ka longïing ka la mad ïa ki jingeh namar kim lah shuh ban bteng ïa ka jingsumar ba ban ka jingduk.
Kaba sngewsih shuh shuh ka long, ba ka Kong Dimo Nongsiej ka lok u Bah Jeningstar ka la ong “Mynta tang ban pyndap ïa u khaw ha ïing ruh ka la shem jynjar bha, ba u lok u la thiah shitom.”
Nalorkata, ka la ïathuh ruh ba ka ram kaba ki hap ban siew ka la kot haduh 1 lak 50 hajar tyngka.
